Espedienten a la SGAE por aplicar tarifes abusives a bodes

El presidente de la Comisión Nacional de la Competencia (CNC), Luis Berenguer, anunció nel Congresu que l'organismu que dirixe entamó un espediente sancionador contra la SGAE pol cobru de posibles tarifes abusives en bailes de bodes.

El procesu respuende a la denuncia efectuada'l pasáu 25 de xineru del 2010 por trés restoranes contra la SGAE por un supuestu abusu de posición de dominiu na aplicación de diches tarifes, tres lo que la Dirección d'Investigación de la CNC acordó con fecha del 29 de payares l'abertura d'un espediente por posibles práctiques restrictives de la competencia.
  
En concreto, señala que tán prohibíes pola Llei de Defensa de la Competencia y el Tratáu de Funcionamientu de la Unión Europea l'aplicación de tarifes abusives en relación a l'autorización de la comunicación pública d'obres musicales en bailes celebraos por cuenta de bodes, bautizos y comuniones nos que l'accesu del personal se realicen al traviés d'invitación personal.
  
L'entamu del espediente nun prexulga'l resultáu final de la investigación, dao qu'agora ábrese un periodu máximu de 18 meses pa la instrucción del espediente y pa la so resolución pol Conseyu de la Comisión Nacional de la Competencia.