Ruma Barbero fai una firma personalizada de Manzajú

El dibuxante asturianu Ruma Barbero va facer unes firmes personalizaes pa los llectores de Manzajú, el so últimu cómic. La firma d’exemplares va ser na Vaina (cai Cervantes, 20) de Xixón, el próximu 3 d’avientu a les 19.30 hores.

“Hebo un tiempu nel que n'Asturies nun había más autopista que la "Y", l'Sporting de Xixón quedaba segundu na lliga, los güelos entamaben a falar del so pasáu y los neños bebíen resfrescos asturianos”, estes palabres resumen “Manzajú”, l’últimu cómic del músicu y dibuxante Ruma Barbero.

“Manzajú” ye la novela gráfica pola que Barbero algamó’l I Premiu de Comic Alfonso Iglesias que convoca’l Principáu d’Asturies. Nesta obra, el protagonista viaxa’l pasáu de la so vida, rememorando con sentíu del humor pasaxes de la infancia de  toa una xeneración de mozos y moces asturianes.