BA apoya’l llabor toponímicu y critica les “presiones esternes”

El Bloque por Asturies manifestó’l so apoyu al trabayu “exemplar” de la Xunta Asesora de Toponimia y pidió que nun ceda “a les presiones de quien ta en contra de la llei por prexuicios contra la llingua asturiana”.

Tres de les protestes d’un grupu de vecinos de Carreño polos topónimos de Quimarán y El Pielero, la Xunta de Toponimia del Principáu d’Asturies ta recibiendo’l sofitu de delles organizaciones hacia’l so llabor y en defensa de la toponimia tradicional del país.

El BA ta acabantes d’apoyar el trabayu por recuperar los nomes tradicionales de los pueblos asturianos. En nota de prensa, los nacionalistes señalaron que “los topónimos de Quimarán y El Pieloro nun dan pie a nengún discutiniu pues tán constataos pa cualquiera persona que pasara alguna vez per esos llugares y se parara a escuchar a les persones que nacieron y vivieron ellí tola vida”.

“D’esta afirmación hai grabaciones de testimonios espontáneos que certifiquen esa realidá y que nun s’atreven a negar nin los pocos encerrizaos que quieren asumir un protagonismu que nun-yos corresponde”, señala’l Bloque sobre esta polémica. Amás, sorrayen que la xera de la Xunta Asesora de Toponimia ta respaldada pola llei.

Prexuicios contra la llingua
Pal Bloque por Asturies, toes estes persones contraries a la normalización llingüística col nome de los conceyos asturianos básense en “prexuicios y obsesiones personales contra la llingua asturiana y la manera como los vecinos llamaron siempre a los sos pueblos”.