Wikileaks destapa la política esterior d’espionaxe d'EEUU

Wikileaks volvió sacudir a la comunidá internacional con una nueva y masiva filtración de documentos de la diplomacia estaounidense que revelen graves irregularidaes cometíes pol Departamentu d'Estáu norteamericanu.

Según los doctumentos, esti qu'ordenaría espiar a los principales responsables de Naciones Uníes, ente otres informaciones revelaes pola organización dirixida por Julian Assange.
  
El Pentágonu y el Departamentu d'Estáu reaccionaron airadamente ante la publicación de los cables, y calificó de "irresponsable" la filtración, por "poner vides en peligru". Wikileaks desoyó les alvertencies formulaes nesti sen polos abogaos de la cartera dirixida por Hillary Clinton y garantizó a lo llargo d'esti domingu l'espardimientu de los documentos, a pesar de sufrir un ataque cibernéticu que dexó la so web (www.wikileaks.org) inutilizada mientres hores.
  
Como asocedió n'anteriores filtraciones, los documentos ficiéronse públicos al traviés de dellos medios internacionales; nesti casu 'Der Spiegel' (Alemaña), xuntu con 'El País' (España), 'Le Monde' (Francia), 'The Guardian' (Reinu Uníu) y 'New York Times' (Estaos Uníos).

Espionaxe na ONU 
Los documentos revelen "una serie de directives humanes d'intelixencia", bien ordenaes por Clinton o pola so predecesora, Condoleezza Rice, polos que s'ordena a los diplomáticos estadounidenses que llogren información d'instalaciones militares, vehículos emplegaos por líderes políticos, y hasta muestres d'ADN y güelgues dactilares", cita 'The Guardian'.
  
Particularmente una d'estes directives tien como oxetivu "a la cúpula de Naciones Uníes". Los diplomáticos estadounidenses debíen, en virtú d'esa orde, llograr especificaciones técniques de los sistemes de telecomunicaciones emplegaos polos principales responsables de la ONU, asina como les sos redes privaes --contraseñes incluyíes-- pal intercambiu d'información personal.

Semeyes de lideralgu
Les informaciones clasificaes destaquen l'averamientu ente'l presidente d'Estaos Uníos, Barack Obama, y Asia, en perxuiciu  de la Unión Europea, a la que considera un actor "en segundu planu" del escenariu internacional, según recueye'l númberu de mañana del magacín alemán 'Der Spiegel', filtráu esta tarde n'internet y recoyíu por un bon númberu de medios internacionales.
  
Estos documentos comparen al presidente iranín, Mahmud Ahmadineyad, col dictador nazi Adolf Hitler, consideren que la canciller alemana Angela Merkel tien calter de "teflón" y describen al presidente afganu, Hamid Karzai, como un "completu paranoicu".
  
Amás, otres cites de los documentos menten qu'Obama prefier estrechar les relaciones con Asia. El presidente estadounidense "nun demuestra nengún tipu de conexón emocional con Europa" y concibe'l mundu como "enfrentamientu ente dos superpotencies" nel que "la Unión Europea ostenta un segundu planu". El presidente galu, Nicolas Sarkozy, ye calificáu por exemplu, como "l'emperador desnudu".
  
No qu'a Italia se refier, los documentos describen les "selvaxes" fiestes del primer ministru Silvio Berlusconi. Les sos relaciones col líder libiu Muamar El Gadafi y col primer ministru rusu Vladimir Putin (al que describen como "un machu alfa") provoquen malestar en Washington.
  
Nel contestu de les relaciones internacionales, los documentos revelen qu'Estaos Uníos emplegó a los prisioneros de Guantánamo como "moneda de cambiu" nes conversaciones diplomátiques o que Washington foi oxetu d'ataques cibernéticos procedentes de China dende hai ocho años --y que Pequín ordenó la contratación de 'hackers' nacionales pa entamar un asaltu pirata sobre la compañía Google--. 

Terrorismu y tensión n'Asia
No qu'a la llucha contra'l terrorismu se refier, destaquen que la principal fonte de financiación de la rede terrorista Al Qaeda siguen siendo mecenes d'Arabia Saudina y de Qatar, un país que s'acobardó al tiempu de contener el terrorismu por mieu a paecer alliniáu con Estaos Uníos.
  
En Yemen, el Gobiernu asumió la responsabilidá d'ataques secretos estaounidenses contra la rama llocal d'Al Qaeda, según una conversación secreta ente'l presidente Ali Abdulá Salé y el daquella comandante estaounidense n'Oriente Próximu, el xeneral David Petraeus, que recibió garantíes de que'l Parlamentu de Yemen nun va conocer la verdadera naturaleza de los bombardeos. "Vamos dici-yos (a los diputaos) que les bombes son nueses y non vueses", aseguró'l dirixente yemenín.
  
Amás, los documentos tamién examinen la situación en Corea'l Norte y Afganistán. En casu de Pyongyang, revelen conversaciones secretes ente diplomáticos estadounidenses y surcoreanos sobre la posibilidá de que'l réxime comunista colapse "por problemes económicos" y "una crisis de socesión" nel momentu en que el líder del país, Kim Jong Il, dexe'l poder.
  
Sobre Afganistán, al marxe de la paranoya mostrada por Karzai, revélase que'l vicepresidente afganu, Ahmed Zia Masud, sacó d'Afganistán 52 millones de dólares sin declarar, nun solu viaxe a Emiratos Árabes.
  
Nel casu d'Irán, n'última instancia, los cables destaquen los esfuerzos estaounidenses pa convencer a Arabia Saudina de qu'una ofensiva militar contra Irán namás retrasaría unos pocos años los esfuerzos de la República Islámica pa llograr una arma nuclear. 

Condena de Washington
El voceru del Departamentu d'Estáu, P.J. Crowley, refugó categóricamente que los diplomáticos estadounidenses s'empleguen como espíes. "Los diplomáticos son namás eso: diplomáticos", aseguró Crowley a 'The Guardian'. "Nun s'involucren n'actividaes d'intelixencia. Representen al nuesu país en tol mundu y caltienen un contactu tresparente con otros gobiernos, y treslládenlu a casa. Ye lo que ficieron mientres cientos d'años", aseguró.
  
La Casa Blanca condenó de la mesma manera la filtración d'unos cables que "podríen afectar negativamente les conversacioens privaes colos Gobiernos estranxeros y líderes d'oposición". "Cuando estes conversaciones apaecen impreses, atenten fondamente non sólo contra los nuesos intereses políticos internacionales, sinón colos de los nuesos aliaos y amigos de tol mundu", declaró'l voceru d'Obama, Robert Gibbs.
  
N'última instancia, el Pentágonu alvirtió que, pa evitar que se repita esti "llamentable incidente", punxéronse en marcha una serie de midíes pa evitar la descarga d'estos documentos clasificaos a memories USB, ente otros formatos portátiles, fizo saber el voceru Brian Whitman.