Manifestación contra la violencia de xéneru

Re-Percusión Feminista Tam Tam Bruxes vien de convocar una manifestación contra la violencia sexista en Xixón. L’actu ye otra de les actividaes qu’esta selmana celebren distintes entidaes por mor del Día contra la Violencia de Xéneru.
“L’asesinatu de muyeres ye pa nosotres una amuesa evidente de que la igualdá ente homes y muyeres ye un finxu que la sociedá tovía tien qu’algamar”, señala’l comunicáu de les feministes. Amás, añaden que “ta claro” que les medides xudiciales, penales, lleis penales d’anguaño son “necesaries pero non suficientes”.
Pa Re-Percusión Feminista Tam-Tam Bruxes l’oxetivu ye siguir lluchando dende ámbitos políticos, educativos, asociativos, sociales y económicos p’acabar cola desigualdá, problema que presenten como “el raigañu de toa violencia machista”.
Dende esta perspectiva, el colectivu feminista asturianu convoca una manifestación bax’l llema “la muerte ye l’últimu eslabón d’una llarga cadena d’opresiones”. La protesta va celebrase’l domingu 28 de payares, con salida a les 13.30 de la Plaza Italia de Xixón. Amás, Tam-Tam Bruxes señala que van participar nes demás actividaes que se convoquen con motivu del Día Internacional Contra la Violencia de Xéneru.
Casos de desigualdá
La trata de muyeres, mutilaciones xenitales, l’ausencia de muyeres nos grandes centros de poder económicu o políticu o’l que’l xéneru femenín cobren menos que’l masculín pol mesmu trabayu, son dalgunos de los aspectos denunciaos por Tam-Tam Bruxes.
El colectivu feminista tamién fala de la cotidianeidá: “la realidá de que siguimos siendo les que nos ocupamos mayoritariamente del trabayu domésticu y del cuidáu de les persones dependientes”.