El Comercio veta a la Corporación Municipal xixonesa

El colectivu de trabayadores d’El Comercio denunció que, tres de la resolución del Plenu de Xixón de regufar los despidos y el treslláu, el diariu xixonés ta vetando a tola Corporación Municipal xixonesa.

“Los xerifaltes del decanu de la prensa asturiana decidieron vetar a tola Corporación Municipal xixonesa por tener l’atrevimientu d’aprobar por unanimidá una resolución contra’l despidu de 29 trabayadores y contra’l surrealista treslláu de la rotativa a Benavente (Zamora)”, denuncien los trabayadores.

Según indica’l colectivu “la Dirección espardió la orden a toles estayes informatives del periódicu pa que nes semeyes apaezan lo menos posibles los conceyales xixoneses”.

Amás, los trabayadores añaden a un nuevu actor nel procesu. A Julio Maese Guisasola (director xeneral) y Goyo Ezama Meabe (director financieru), súmase’l director Iñigo Noriega Gómez. D’él afirmen que s’aconceyó cola alcaldesa, Paz Fernández Felgueroso, pa qu’esta-y diera “la bendición” pa los despidos y la deslocalización.

“A éstos depredadores nun-yos basta con intentar despedir a una treintena de trabayadores nuna empresa con 600.000 euros de beneficios, presentar un ERE namás que cuatro díes dempués de que’l Plan Xeneral d’Ordenación aprobára-yos el pelotazu urbanísticu y llevase dos provincies más abaxo la planta d’impresión del diariu más representativu de Xixón”, acaben los trabayadores qu’afirmen que yá tienen 7.010 firmes a favor.

Cambiu na llínia editorial
Nel últimu comunicáu del colectivu tamién falen del cambiu de llínia editorial del periódicu. “La Dirección d’El Comercio ta allanando con toa tripa d’artimañes y censures informatives el camín de Francisco Álvarez-Cascos hacia la presidencia del Principáu”, sentencien.