UNA reclama mayor contundencia contra'l machismu

Unidá Nacionalista Asturiana (UNA), coincidiendo col Día contra la Violencia de Xéneru que se celebra esti día 25 de payares, reclamó a instituciones y partíos políticos una mayor contundencia contra'l machismu existente na sociedá.

A xuiciu d'UNA, les muertes de les muyeres nin son inevitables nin consecuencia d'una fatalidá, sinón "el reflexu" d'una sociedá incapaz de ver a la muyer como una persona con plenos derechos. "Superar esta realidá esixe'l compromisu de toos y la voz de toes pa evitar que la voz de les que falten s'apague definitivamente", defendieron.
  
Amás, añaden que la xudicatura caltién "fedor a franquismu", aludiendo a la negativa a utilizar toles ferramientes al serviciu de la protección de muyeres amenazaes.
  
"De la muyer floreru pasamos a poner flores por cada víctima d'un modelu social que cada día esixe más a les muyeres, sin que la so independencia y derechos se desarrollen en pie d'igualdá col de los homes", señalaron dende UNA.