Día del Llibru Asturianu

L’Sporting algama un trunfu épicu frente al Sevilla

|

La meyor cara del Sporting volvió apaecer frente al Sevilla. Los asturianos, con un xugador menos durante una hora, fueron quién a derrotar al tercer clasificáu de la Lliga gracies a una defensa impecable a lo que s’añadió un porteru mui seguru, el debutante n’El Molinón Lafuente, y un ataque efectivu, de la mano de Carmelo y  Castro. La épica volvió al vieyu estadiu xixonés.
 
L’Sporting salió con ganes de resolver el partíu dende’l primer minutu énte un Sevilla decepcionante, feble en defensa y inoperante n’ataque. D’esti mou yá a los 5 minutos l’Sporting pudo adelantase gracies a un penalti por una mano nel área d’Escudé. Sicasí, Palop pararía’l llanzamierntu de Bilic. Esto nun afectó a los xixoneses, que siguieron sorprendiendo a la contra a los sevillistes, hasta que nel minutu 16 Diego Castro remató de cabeza un gran centru de Carmelo, batiendo al porteru del Sevilla. Poco depués Bilic tendría la posibilidá del segundu, pero pecó d’individualismu al tirar contra’l porteru en cuentes de pasala a dos compañeros desmarcaos nun gol casi seguru.

A los 28 minutos llegaría la xugada que pudo ser clave nel partíu. Canella realiza una dura entrada al sevillista Capel. L’árbitru espulsó al xugador asturianu con una rigurosísima roxa directa, dexando al Sporting con 10 pal restu del partíu. Nesta circunstancia los asturianos debieron resistir los ataques sevillistes, bien controlaos por una defensa mui segura y una gran actuación del porteru Lafuente. Nin los pesos pesaos del Sevilla, que salieron na segunda parte, como Kanouté o Renato, fueron quienes a siquiera empatar el partíu.

Esti trunfu asitia a los asturianos nel puestu 11 con 27 puntos.

Ficha técnica

Sporting de Xixón 1- Sevilla 0

Sporting: Lafuente, Sastre, Iván Hernández, Gerard, Canella, Michel, Diego Camacho, Maldonado (Cámara, m.34), Carmelo (Matabuena, m.82), Diego Castro y Bilic (Barral, m.63).

Sevilla: Palop, Crespo, Prieto, Escudé, Dragutinovic, Navas, Duscher (Renato m.67), Facio, Capel, Romaric (Kanouté, m.45) y Chevantón (Acosta, m.58).

Gol: 1-0. m.16. Diego Castro.

Árbitru: Megía Dávila. Espulsó con roxa directa a Canella (m 28) y casiqué al final del partíu al entrenador sportinguista Preciado y al so segundu Iñaki Tejada por protestar. Sacó tarxeta amariella a Camacho (m 6), Navarro (m 34) y Carmelo (m 52).

 

Contador Estadistiques