Valledor pide esplicaciones a la conseyera de Cultura pol informe européu sobre llingües minoritaries

Al traviés d’una carta a la conseyera de Cultura Mercedes Álvarez, el diputáu d’IX-BA-LV Francisco García Valledor pide esplicaciones polos datos que sobre l’asturianu apurrió’l Gobiernu español al informe “Aplicación de la Carta Europea de las Lenguas Regionales y Minoritarias” publicáu pol Conseyu de Ministros del Conseyu d’Europa.

Pal diputáu de la Xunta Xeneral “resulta inesplicable y inaceptable que les autoridaes españoles nun apurriesen datos sobre l’asturianu y el gallego-asturiano dende 1991, por mor que dende’l Gobiernu español dizse ‘nun disponer de nuevos datos en relación a los proporcionaos en 1991’. Namás que dende la desidia o’l despreciu a la nuesa llingua puede facese afirmación tala depués de diecisiete años”.

Valledor acusa a les autoridaes españoles de “treslladar una visión falsa qu’atenta contra la propia consideración y dignidá de la llingua asturiana al  afirmar que ‘ye una llingua ensin normalizar y ensin lliteratura escrita adecuada, y que’l procesu de codificación entá non acabáu’, ignorando la existencia d’una gramática, d’un diccionariu, d’una rica y amplia lliteratura, d’una toponimia y en definitiva de tol trabayu de normativización fecha pola Academia de la Llingua”.

El diputáu d’Izquierda Xunida conseña na carta que “les autoridaes españoles nunca fixeron referencia al mou en que s’aplicó la llexislación, nin proporcionaron exemplos concretos, a pesar de que se solicitó pol comité d’espertos” lo que significa “indiferencia, dexadez, infravaloración o despreciu del Gobiernu d’España hacia l’asturianu y el gallego-asturiano”.

Por too ello Valledor solicita a la conseyera de Cultura y al Gobiernu asturianu tresllade "la so fonda disconformidá cola actitú adoptada poles autoridaes españoles con relación a la información aportada y la falta de respuesta a munches cuestiones” del Informe.