Ecoloxistes opónense a la matanza de 230 cormoranes grandes

Una bona riestra d’organizaciones medioambientalistes vienen d’oponese a la resolución de la Viceconseyería de Mediu Ambiente pa la matanza de 230 cormoranes grandes nos ríos d’Asturies.

El cormorán grande ye una especie que s’alimenta de salmónidos, daqué consideráu negativu pol colectivu pescador n’Asturies nel desendolque del so llabor. Sicasí, los ecoloxistes señalen que los salmónidos namás que son un pequeñu porcentaxe de la dieta del animal.

“Face-y responsable de la mengua de truches y salmones namás que quier buscar una ‘cabeza de turcu’ a la que responsabilizar de tolos males de los nuesos ríos”, expliquen los ecoloxistes, quienes argumenten que la verdadera causa ye la contaminación de ríos, la bayura de preses y la sobrepesca marina, ente otres.

Pa los ecoloxistes nun ye aceptable que se quiera eliminar a más de 230 exemplares de cormorán grande por “agradar” a los pescadores. Amás, sorrayen que “toles esperiencies de controles d’esta especie nun significaron un aumentu de la pesca de peces nin una baxada del númberu d’aves”.

“Esta práctica d’aprobar la caza d’especies por presiones ye una amuesa más de la falta de polítiques de conservación de la fauna salvaxe per parte del Principáu”, critiquen los ecoloxistes. Amás, sorrayen qu’esta resolución de la conseyería “nun ta avalada por estudiu científicu conocíu”.

De la protección a la esterminación
A lo último, los colectivos ecoloxistes asturianos recordaron qu’hasta l’añu 2004, el cormorán grande taba catalogáu d’especie de “interés especial”, pasando de protexese a querer exterminase. Por ello, los ecoloxistes llamen al diálogu y “fundamentu científicu” pa iguar una solución nesti tema.