L’asturianu nun va ser “llingua propia” de la Universidá

La Comisión que ta ellaborando los nuevos estatutos de la Universidá d’Uviéu refugó la propuesta que la profesora Paz Andrés presentó na primer reunión de la Comisión na que se pedía “l’usu del asturianu como llingua propia de la Universidá d’Uviéu, siendo empleada n’igualdá de condiciones y garantizándose la non discriminación”.

Según informa La Nueva España’l secretariu xeneral de la Universidá, José Francisco Fernández, conseñó que’l testu presentaú yera asemeyáu al d’universidaes asitiaes en comunidaes nes qu’hai llingües cooficiales. El secretariu xeneral fixo referencia a delles sentencies xudiciales que ñeguen que determinaes instituciones tengan capacidá pa declarar la oficialidá d’una llingua. Según Fernández ye’l casu de los conceyos y de la Universidá.

Tamién planteóse  una enmienda transaccional que pretendía treslladar a los estatutos de la Universidá lo que diz la Llei d’Usu y Promoción del Asturianu, con un testu que dicía “tolos miembros de la comunidá universitaria tienen derecho a emplear el bable/asturianu, yá espresáu de palabra o per escrito”. Esta propuesta tamién refugóse.