La Xunta pola Defensa de la Llingua celebró los sos 25 años

El salón d’actos del Muséu de Belles Artes abellugó l’actu del 25 aniversariu de la Xunta pola Defensa de la Llingua Asturiana.  Xune Elipe, Manuel González “Eve”, Penélope Miranda y Llucía Menéndez falaron nun actu nel qu’amestáronse alcordances, reivindicaciones y anécdotes, too ello con dellos montaxes audiovisuales que percorrieron parte de la historia d’esta organización. L’aniversariu rematóse cola actuación del músicu Alfredo González.

El salón d’actos del Muséu de Belles Artes d’Asturies, llugar del primer aconceyamientu de la Xunta, quedó pequeñu p’acoyer esti primer actu d’aniversariu de la organización en defensa del idioma. Xune Elipe entamó recordando los entamos de la organización, les primeres reuniones y manifestaciones, o’l primer conciertu pola Oficialidá celebráu n’Avilés. Darréu  proyectóse la noticia ellaborada por “Panorama Regional” de la primer manifestación de la XDLLA, nel añu 1988.

Darréu faló Manuel González “Eve”, que repaso dellos fechos relevantes de finales de los 80 y los años 90, recordó casos de represión llingüística como los sufridos pol xefe d’estación de Nava por usar toponimos n’asturianu o la d’un taxista d’Uviéu sancionáu pola empresa por usar l’asturianu nel so trabayu. Tamién dio anuncia de dellos actividaes conmemoratives más a celebrar esti añu, como la ellaboración d’un documental y un llibru. Seguidamente proyectáronse delles videos de personalidaes sofitando la oficialidá, como Hevia, Victor Manuel o Corín Tellado.

Penélope Miranda fixo la tercera intervención, faciendo alcordanza de la fundación de la estaya xuvenil de la XDLLA, Xunta Moza, y de delles actividaes feches nos últimos años, nes que rescampló l’apaición de la perconocida “Pita”.

La última intervención foi de Llucía Menéndez, que fixo un repasu a la situación actual del movimientu de reivindicacion llingüística y de los retos qu’afronta, como la reforma estatutaria o la inclusión del nuesu idioma nos nuevos estudios reglaos universitarios.

L’actu finalizaó con un breve conciertu del músicu Alfredo González, qu’interpretó pieces del so discu “La nada y tú”, nel que pon música a poemes d’autores como Berta Piñán o Xandru Fernández.