El Bloque presenta una proposición pa evitar despidos de bomberos

Bloque por Asturies quier evitar el despidu, de los 21 empleaos de la entidá Bomberos d'Asturies qu'anguaño tienen calter "indefiníu discontinuu". Pa ello va presentar una proposición non de llei nel parlamentu.

L'Alministración anunció apocayá la finalización del contratu d’estos trabayadores cuando entá nun acabó l'actual procesu d'oposición pa 78 places, convocáu pola Alministración Autonómica.

Por esti motivu movilizóse la plantiya, alegando que se trata de places a estinguir, ye dicir, "hasta'l momentu en que los trabayadores les abandonen voluntariamente o por xubilación".
  
El diputáu del BA na Xunta Xeneral del Principáu, Roberto Colunga, y el voceru de la organización, Rafael Palacios, comparecieron en rueda de prensa, acompañaos polos voceros del Comité de Bomberos en Llucha, Susana Iglesias Fernández y Pablo Rodríguez Márquez, p'anunciar la próxima presentación d'esta proposición a la Xunta Xeneral del Principáu.
  
El Bloque pretende que'l restu de grupos se posicionen ante esti conflictu y que la conseyera "de les correspondiente esplicaciones públiques". La formación considera "pergraves" estos despidos", porque "afecten de forma importante a la calidá de los servicios públicos y a la seguridá ciudadana".
  
Asina, suscribieron los planteamientos del comité de Bomberos d'Asturies, recordando qu'estos empleaos "ganaron una sentencia con fecha 10 d'avientu de 2004 que reconocía'l so derechu a ocupar les places".
  
Susana Iglesias recordó que los puestos qu'ostenten "son places a estinguir, esto ye, que s'han de caltener hasta que lo dexemos voluntariamente o por xubilación". Asina, recordó que de nenguna manera pueden esaniciase estos puestos, argumentando una convocatoria d'oposiciones, pol so calter "indefiníu discontinuu".

Recuerda amás que toos estos planteamientos tán recoyíos nel conveniu colectivu robláu pol Comité d'Empresa y la dirección de Bomberos d'Asturies. Los ocupantes d'estos puestos vienen siendo contrataos mientres nueve meses al añu.
  
Tanto'l Bloque como los representantes de los bomberos recordaron que "los trabayadores afectaos tienen esperiencia y cualificación demostrada n'ocasiones mientres diez o 20 años". A entrugues de los periodistes, Susana Iglesias reconoció que tienen la posibilidá de presentase a les oposiciones como'l restu d'aspirantes, pero independientemente d’ello, les places tienen de siguir existiendo hasta la so estinción por xubilación o decisión voluntaria del trabayador.

Recordó que dalgunes de les persones qu'ocupen los puestos señalaos tán cerca yá de la xubilación y nun tienen condiciones físiques pa competir nunes oposiciones de bomberos con chavales de 20 años.
  
Los movilizaos amuésense convencíos de que van consiguir que los tribunales decreten el calter improcedente de los despidos, pero entá asina, señalaron que yá falaron cola Conseyería y que se van caltener los despidos de toes formes.
  
Pablo Rodríguez incidió en que mientres se “despide" a trabayadores de Bomberos d'Asturies, "l'Alministración defende la designación a deu d'altos cargos, en contra de sentencies xudiciales".
  
Coles mesmes, recordó que cunten col sofitu de 5.000 firmes ciudadanes y de tola plantiya de Bomberos d'Asturies.

“Esto ye namás el principiu”
Rafa Palacios denunció la rueda de despidos de trabayadores eventuales, temporales y interinos" na Alministración Pública, na qu'enmarcó la situación actual de los bomberos.
  
Señaló tamién qu'hai 500 profesores menos n'enseñanza, y un “procesu de privatización" de la sanidá. "Esto ye namás el principiu de lo que nos espera pal 2011", alvirtió.