El Bloque va participar nun congresu de llingües minoritaries

El responsable de movimientos sociales del BA, Nacho González, va asistir al congresu 'Bones práctiques pa la promoción de les llingües minoritaries nel ámbitu de la tecnoloxía de la información y la comunicación', en Bilbao.

Según el Bloque por Asturies, na sociedá actual la tecnoloxía nueva ye imprescindible nel procesu de recuperación y la normalización d'una llingua minoritaria como ye'l casu de l'asturiana. Les llingües que nun s'incorporen a les comunidaes tecnolóxiques cuerren el riesgu de cayer nuna marxinalidá tovía mayor.

Les persones moces son les que más demanden esta ferramienta y son precisamente un sector estratéxicu a la hora de desarrollar una política de recuperación llingüística seria y ambiciosa.
  
Nel congresu, que tien llugar los díes 18 y 19 de payares nel Palaciu Euskalduna de Bilbao, van participar espertos d'ámbitu internacional nel trabayu del usu recuperación de llingües minoritaries, amás de técnicos de normalización llingüística, maestros y responsables políticos.