Madrid estudia vincular el salariu de funcionarios a la productividá

El vicepresidente terceru del Gobiernu y ministru de Política Territorial, Manuel Chaves, desveló que l'Executivu ta "estudiando" una fórmula que permita vincular el salariu de los funcionarios a la so productividá.

Pa ello va reunise colos sindicatos, y refugó la posibilidá de que los trabayadores públicos nun tengan carácter indefiníu.
  
Mientres la so intervención nos Almuerzos Informativos d'Europa Press, Chaves reconoció que la secretaria d'Estáu de Función Pública, Consuelo Rumí, ta estudiando delles fórmules sobre la posibilidá de que'l sueldu de los funcionarios tea lligáu a la so productividá. Pa ello va caltener tamién alcuentros colos sindicatos.
  
Sicasí, refugó radicalmente acabar con carácter indefiníu del trabayador públicu porque, según defendió, nun apoya que l'alministración pública "seya una empresa privada". Al so xuiciu, el sector priváu nun empresta meyor servicios nin funciona meyor que l'alministración pública.
  
"L'alministración pública agora nun pue privatizase al traviés de que la relación funcionarial torne en relación privada como la de cualquier otra empresa", calcó, antes de reconocer sicasí que, "lóxicamente", sí que se debe meyorar la situación de los funcionarios, la so formación y el so prestixu ante la sociedá.