Ecoloxistes denuncien nuevos vertíos illegales al ríu Xera

La Coordinadora Ecoloxista d'Asturies denunció ante la Confederación Hidrográfica y ante el Principáu d'Asturies los "continuos vertíos illegales" que se vienen produciendo al ríu Xera na localidá de Pilotuertu nel conceyu de Tinéu.

Al traviés d'un comunicáu la organización ecoloxista aseguró que se comprobó cómo'l ríu Xera, tres el so pasu pola esplotación minera baxa "dafechu negru por cuenta de la elevada carga de restos de carbón que lleva".
 
Pa los ecoloxistes esta ye una evidencia de que la empresa nun ta realizando la necesaria decantación de les agües de escorrentía en diches instalaciones mineres, produciendo un vertíu al ríu Xera en contra de les condiciones dispuestes na Llei d'Agües.
La Coordinadora destacó amás qu'esta esplotación minera propiedá de Victorino Alonso cuntó con importantes subvenciones pa mecanizar la esplotación y ameyorar el tratamientu del mineral y de les agües de la esplotación.
  
"Resulta evidente qu'estos vertíos de carbón al ríu demuestren la falta de cumplimientu de les condiciones d'autorización d'esta esplotación y amuesa los constantes incumplimientos d'esti grupu empresarial col mediu ambiente", conclúin los ecoloxistes.