Siero acueye un alcuentru de bandurrieros asturianos

Los músicos de bandurria asturiana, instrumentu medieval con caracterísques úniques, van celebrar un alcuentru’l próximu 27 de payares en Siero. Cantarinos, romances, asturianaes o coples son dalgunes muestres del so repertoriu.

“Los bandurrieros y bandurrieres son músicos que toquen un vieyu instrumentu qu’aportó hasta nós dende dómines medievales y que se conservó, sobre tou, nel Oriente d’Asturies y nel Occidente de Cantabria”, señala Dani García de la Cuesta, organizador del eventu, sobre esti instrumentu tradicional.

Pa recordar y esparder los soníos tradicionales, el próximu 27 de payares na Taberna Cuévano de La Pola Siero, va facerse un alcuentru ente instrumentistes de bandurria asturiana. Arrancará dende les 21 hores con entrada llibre.