España nun conderga los incidentes de L’Ayún porque naide lo fizo

La ministra d'Asuntos Esteriores y de Cooperación, Trinidad Jiménez, calcó en nun condergar los "graves fechos" asocedíos en L’Ayún ante'l fechu de qu'otros gobiernos y organismos internacionales tampoco lo ficieron.

"Pa condergar habría que tener un conocimientu compleu de cuálos fueron los fechos que se produxeron", sorrayó al términu del Conseyu de Ministros.
  
Según Jiménez, el Gobiernu "nun quier" apresurar na so condena y "ta a la espera" de qu'algún organismu internacional ofreza un balance de  lo asocedío. Nesti sen, calcó especialmente en que "nenguna institución, nengún organismu nin gobiernu "lo fizo".
  
La ministra negó que l'Executivu tenga "nengún tipu de mieu" a represalies per parte de Marruecos nel planu de la cooperación na llucha contra la inmigración y el terrorismu si condena la so intervención pa esmantelar el campamentu de protesta de L’Ayún.
  
Según la representante estatal, el Gobiernu nun tien esti mieu porque caltién "una relación sólida" con Rabat y existe "una capacidá" de treslladar a les autoridaes marroquines "los nuesos planteamientos", como asocedió nesta ocasión nos contactos que tanto ella como'l vicepresidente del Gobiernu y ministru del Interior, Alfredo Pérez Rubalcaba, caltuvieron colos sos homólogos marroquinos.
  
El Gobiernu ta defendiendo "los intereses d'España" y considera que la so "actuación requier el nivel de xestiones que caltuvimos hasta'l momentu pa ser útiles y contribuyir a la solución d'esta situación que se creó". "Vamos siguir trabayando", aseguró, defendiendo una vez más "la prudencia".

El Gobiernu llamenta
Nuna intervención inicial en que formuló la posición del gobiernu español al respecto de lo asocedío, Jiménez llamentó "fondamente la perda de vides humanes" nos "fechos graves" asocedíos n'el aaiún y espresáu la "fonda preocupación" del executivu.
  
"El Gobiernu refuga la violencia como métodu pa resolver conflictos", afirmó, encamentando a les partes "al diálogu" y a la contención pa restablecer la "normalidá na zona". A esti respecto, calcó en que ye "positivo" que Marruecos y el Frente Polisariu se reunieren esta selmana en Mahannset pese a lo asocedío en L’Ayún.

Entrada de los periodistes  
Per otra parte, la xefa de la diplomacia aseguró que se solicitó a Marruecos que "facilite l'accesu" a la prensa española pa que puea "trabayar con normalidá y total tresparencia".
  
Coles mesmes, espresó "la solidaridá" colos periodistes que tán informando sobre "los acontecimientos" y "l'apoyu" del Executivu al llabor imprescindible pal conocimientu "de la situación".
  
Por ello, añedió, llamenta "la espulsión de los periodistes de la cadena SER independientemente de que nun entraren o nun contaren cola autorización esixida poles autoridaes marroquines". Los periodistes de la Cadena SER Àngels Barceló, Nicolás Castellano y Ángel Cabrera alcuéntrense nel aeropuertu de L’Ayún a la espera de que los espulsen hacia España, tres llegar ayeri a la capital del Sáhara Occidental.
  
De la mesma manera, la ministra pidió que se restituya l'acreditación al corresponsal del periódicu 'ABC'". El Ministeriu de Comunicación marroquín retiró l'acreditación a Luis de Vega, alegando "práctiques d'animosidá y falsificación de los fechos" na cobertoria de los actos de violencia y "vandalismu" en L’Ayún, según l'axencia oficial marroquina MAP.
  
Españoles nel campamentu
No referente a los trés españoles que s'alcuentren nel campementu de protesta y que nesti momentu tán en L’Ayún, Jiménez indicó que tán "llocalizaos" y hai un contactu "permamente" con ellos pa saber si tán bien. "Esperamos facer les xestiones necesaries pa poder sacalos de la zona", precisó.
  
N'ambos casos, la ministra dexó claro que se ficieron "xestiones mañana, tarde, nueche y madrugaes p'asegurar la protección consular de los españoles que "s'alcuentren" en L'Ayún, tanto ella como l'embaxador y el cónsul en Rabat.
  
Nesti sen, precisó que'l so departamentu ta "estudiando la posibilidá" de que'l cónsul xeneral en Rabat se desplace a L’Ayún de forma "mui puntual y coyuntural" pa poder garantizar la protección de los españoles que se "desplazaren eventualmente" a esta ciudá.
  
"Nun ye habitual y nun lo ficimos con anterioridá", reconoció Jiménez, precisando que se ta estimando dende'l puntu de vista de la práctica diplomática y consular, sin qu'haya una decisión definitiva.
  
Per otra parte, calcó en pidir a Marruecos qu'esclare de manera urxente les circunstancies en que se produxeron "los fechos" del llunes y en concreto'l fallecimientu del ciudadanu con DNI español  Baby Hamday Buyema.