Cortina: “La simple voluntá d’axuntar fuerces asturianistes nun ye abondo”

Sixto Cortina (Xixón, 1966) ye militante del PAS dende 1991. Foi miembru de la Executiva Nacional y Secretariu d’Organización hasta’l 2000. Anguaño ye’l encargáu de les rellaciones con otres fuerces polítiques.

El Partíu Asturianista ta celebrando esti añu los sos 25 años ¿Qué balance xeneral fai de tou esti tiempu?
Un cuartu de sieglu da pa munches coses. Nestos años tuvimos éxitos notables en defensa de los asturianos y otros momentos de menos rellumu, como bien se sabe. Lo más importante ye que representamos una continuidá nesti tiempu como una organización que tien a Asturies y a los asturianos como única exa del so trabayu, y eso naide más lo puede dicir con tanta razón como nosotros. Pa recordar, la nuestra presencia institucional (siguimos siendo la cuarta fuerza política asturiana), la collaboración col Gobiernu de Sergio Marqués, la Llei del Asturianu… y munches otres acciones que diba ser mui llargo equí conseñar.

¿Y de los actos celebraos? ¿Va haber dalguna convocatoria más pa celebrar los sos 25 años?
Dalguna sorpresuca más puede que tengamos guardada.

Nesti tiempu tamién fueron a algamar que xente mozo participe nesti proyectu políticu al traviés de Xuventú Asturianista…
Ún de los síntomes y, al empar, una de les consecuencies de la decadencia d’Asturies ye, precisamente, la incapacidá pa da-y continuidá o relevu xeneracional al país: la llingua y la cultura asturianes viven en peligru porque nun se tán tresmitiendo afayaízamente a les nueves xeneraciones, y mesmamente’l país tien un gravísimu problema demográficu. Por eso nosotros nel PAS siempre-y dimos gran importancia a les persones más moces, a la formación política de les nueves xeneraciones y, en 25 años, como ye fácil suponer, munchos rapazos y rapaces que pasaron per Xuventú Asturianista convirtiéronse depués en dirixentes del partíu.

Con vistes al futuru, ¿Cuáles son los retos y oxetivos del so partíu?
Los oxetivos, a llargu plazu, siguen siendo los mesmos de los nuestros estatutos fundacionales, como nun podía ser d’otra mena: caltenimientu dinámicu de la identidá asturiana y progresu material y cultural de los asturianos. A curtiu plazu, cómo non, incrementar la nuestra presencia nos conceyos y volver a la Xunta Xeneral, onde tuvimos dos llexislatures.

En mayu Asturies tien una cita electoral, ¿Cómo va participar el Partíu Asturianista nella?
Nosotros tenemos un alcuerdu estable cola URAS y yá concurrimos en xunto los dos a delles cites electorales. La nuestra vocación de sumar sigue intacta y esi ye’l marcu nel que nos enfrentamos a les elecciones autonómiques y municipales de mayu del añu qu’entra.

Dende dalgunos espacios pidíase con ilusión que toles fuerces asturianistes fueren xuntes a les elecciones. ¿Qué-y paecen esos encamientos?
La ilusión, delles veces, escentéllase escontra la razón. Primero, hai que recordar que la política fáenla los partíos políticos y non la opinión pública, por más unánime que nos abulte’l so paecer. Segundo, ye probable que la simple voluntá d’axuntar fuerces asturianistes nun seya abondo, porque más p’allá d’esi sentimientu lo que nos separa ye demasiao. Tercero, el que tien la llexitimidá pola so trayectoria, la fuerza electoral, la esperiencia institucional y les persones más afayaízes ye’l Partíu Asturianista, y reconocelo cuesta a vegaes munchu trabayu. Nosotros respetamos muncho esos encamientos a la xuntura, pero paez que la oficialidá del asturianu y una reforma estatutaria nun son programa abondu pa ponenos d’alcuerdu.

Siguiendo nesta llinia, n’otres declaraciones miembros del so partíu afirmaben que taben teniendo contactos con otres organizaciones asturianistes y n’actos públicos pudo vese; sicasí, paez que too esto quedó pa prau. ¿Hai causes pa qu’esos contactos nun cuayaren en nengún alcuerdu políticu a nivel más altu?
Contactos sí que se tuvieron, pero esta tampoco ye la primer vez. Lo que sí quedó claro ye que l’asturianismu políticu tien la convicción de que fai falta emburriar nel mesmu sen pa pone-y frenu al declive del país, pa combatir el réxime políticu de la izquierda y pa torgar la llegada al poder n’Asturies d’una derecha ensin contrapesos nin matices. Si la convicción ye que’l nacionalismu asturianu nun tien futuru más qu’axuntando, nosotros siguimos en disposición de falar.

Otra de les crítiques que se vos fizo foi que’l PAS nun participara nel actu plural convocáu pal 8-S en Xixón...
Al Partíu Asturianista convidóselu a un actu políticu pal Día de la Nación qu’acabó por ser un actu de protesta social que poco tenía que ver col 8 de setiembre. Nosotros contábemos dir si yera la espresión “política” de la nación, representada por partíos políticos asturianos. Pero nun pudimos dir, porque la convocatoria abrióse a tol que tuviera una quexa qu’espresar (por más llexítima y compartida que fuera) y porque nun quedaba clara la importancia de caún los participantes.

Volviendo al tema electoral, munchos partíos n’Asturies yá anunciaron al so candidatu y, anque nun seya públicu, ¿podríemos falar de Xuan Xosé Sánchez Vicente como’l candidatu del PAS?
El candidatu del PAS, obviamente, ye Xuan Xosé Sánchez Vicente, pero nun me prestaría adelantame a los acontecimientos y prefiero respetar a los muérganos del partíu y a los nuestros socios de la URAS, colos que tamos trabayando intensamente estes selmanes. Cuando tengamos una decisión formal podremos falar yá del candidatu.

URAS ye’l so aliáu políticu na coalición Unión Asturianista; falando d’aliances fuera del asturianismu, ¿Qué opina d’IDEAS? La so propuesta nun ye mui estremada de la d’URAS…
La sociedá asturiana presenta tolos síntomes d’una sociedá secuestrada por esa máquina famienta y fartuca al tiempu de poder que ye la izquierda centralista. Y ún d’esos síntomes ye la desorientación, que provoca que surdan les aventures polítiques efímeres, inxenues y personalistes. Ellos mesmos lo dicen nel so nome, son “independientes d’Asturies”.

Y si a la fin aporta Cascos a Asturies, ¿cómo podría influir na coalición Unión Asturianista? Dígo-ylo porque hai que recordar qu’URAS nació tres de la crisis nel PP surdida por mor de la figura de Cascos…
La inutilidá del PP pa los asturianos nun puede ser más completa. Yá la entamaron en 1998, cuando nun quixeron consentir un presidente que gobernase pa los asturianos, y agora vuelven a les andaes. Si Cascos ye candidatu supongo que l’alderique políticu volverá a escapase de la realidá asturiana pa centrase en coses y persones que nada nun tienen que ver col país. Pero abulta perdifícil a esti altor que Cascos seya’l candidatu de nada.

Per otru llau, ye evidente que tán moviéndose coses en sectores de la izquierda asturianista. Si se materializa un proyectu más o menos unitariu, ¿nun cree qu’esto podría ser negativu pa los resultaos del so partíu?
Nosotros, anque a dellos-yos cueste trabayu creelo, siempre nos alegramos del éxitu d’otros asturianistes, siempre celebramos los avances del nacionalismu asturianu, seya’l que seya’l protagonista, y siempre nos enchipamos ufanos cuando daqué relacionao col país avanza, medra y meyora. Si llega’l casu qu’usté apunta’l Partíu Asturianista sentiría orgullu de qu’unos asturianos s’aconceyaren alredor de la idea de país y taría, como siempre, dispuestu a collaborar con ellos nos asuntos nos que fuere posible facelo.

Pa dir acabando… ¿Por qué cree que dempués de tantu tiempu l’asturianismu nun se afita electoralmente n’Asturies?
Primero, l’asturianismu tien una presencia electoral, modesta pero constante, coles candidatures que, solu o acompañáu d’otros partíos, protagonizó’l PAS estos caberos 25 años. Convién recordalo, la mayor proyección institucional y social del asturianismu foi la presencia de Xuan Xosé Sánchez Vicente na Xunta Xeneral con unos resultaos que cada día que pasa se valoren más. Depués, delles circunstancies dexaron por mui poco al nacionalismu fuera del Parlamentu.

Y a toes eses persones que nun creen nun proyectu asturianista, ¿qué-yos diría pa convencelos de que ye necesariu qu’esi espaciu políticu tenga representación nel país?
Dígo-yos que crean nellos mesmos, que crean n’Asturies, que nun habrá manera de progresar nin de sobrevivir como asturianos si nun nos ponemos al mandu del nuestru país con determinación, xenerosidá y prudencia. Y que si nun cuenten qu’eso-yos faiga falta a ellos, que camienten que sí-yos fai falta a los sos fíos, a les xeneraciones venideres d’asturianos.