Pulgar diz que la sentencia del TSXA "nun se pue recurrir"

La Xunta organiza una movilización contra’l recursu anunciáu pol Conseyeru d’Educación, Herminio Sastre, contra la sentencia del TSXA. El voceru del colectivu, Carlos Pulgar, declara a ASTURIES.COM qu’esta sentencia “nun se pue recurrir”.

El pasáu mes d’ochobre’l Tribunal Superior de Xusticia d’Asturies (TSXA) dictó sentencia contra la ratio mínima d’ocho alumnos pa poder estudiar llingua asturiana na Educación Secundaria. Sicasí, el Conseyeru d’Educación, Herminio Sastre, calificó les consecuencies de la sentencia de “espilfarru” y anunció que diba recurrila.

“Tenemos consultao delles fontes xurídiques qu’indiquen que ye una sentencia que nun se pue recurrir”, declara’l voceru de la Xunta Pola Defensa de la Llingua Asturiana. Amás, Pulgar sorraya que “en tou casu, l’alministración, Educación y el Sr. Sastre tienen que cumplir la llexislación vixente y executar la sentencia inmediatamente”.

En respuesta a les intenciones del conseyeru y pol derechu a estudiar asturianu, el colectivu prollingua convoca un actu que va consistir nuna clase d’asturianu na cai, con sielles y enceráu. “Yá ficimos Clases na Cai delles veces, una de les últimes foi tamién na plaza La Escandalera con bien de xente”, señala Pulgar a ASTURIES.COM sobre esta movilización que va arrancar a les 13 hores, na mentada plaza de la Escandalera d’Uviéu.

“Desamparu y marxinación”
“L’asturianu ta na mesma situación de desamparu y marxinación que nos años ochenta. L’incumplimientu de la llei y la discriminación d’enseñantes y escolinos, ye la norma”, critica’l voceru de la Xunta sobre la presencia de la llingua nel sistema educativu.

Pulgar tamién ye claru sobre los retos y oxetivos del asturianu na enseñanza: “llograr la Especialidá pa acabar cola inestabilidá de los maestros y maestres y ordenar les llistes en función de los conocimientos y los méritos. Depués trátase de facer del asturianu una asignatura curricular como les demás, dando-y presencia en tolos niveles educativos, y echar a andar los centros qu’usen l’idioma de forma vehicular en conteníos de tou tipu”.

Sobre la denuncia de Xeira
Entrugáu pola denuncia que fizo Xeira de que na zona llingüística del Navia-Eo hai escueles qu’ufierten asturianu en cuenta de gallego-asturianu, Pulgar denunció que “l’alministración educativa amuesa de contino’l despreciu a les lleis en vigor y un desconocimientu evidente de la realidá sociollingüística d’Asturies”.

Amás, añade que dende la Xunta Pola Defensa de la Llingua Asturiana defenden “l’usu vehicular de cada llingua en so territoriu nos primeros niveles educativos, pa depués favorecer el conocimientu d’entrambes dos ente tola ciudadanía asturiana.”.