Otegi: "hasta'l presidente" sabía que se celebraría'l mitín d'Anoeta

L'ex voceru de Batasuna, Arnaldo Otegi, reconoció, nel xuiciu nel que se-y xulga pola so participación nel mitín celebráu nel 2004 nel Velódromu de Anoeta, que'l PSOE conocía'l conteníu del actu.

"Yera una propuesta de la que diba tar pendiente'l conxuntu del país, hasta presidentes del Gobiernu", añadió, en respondiendo afirmativamente a la entruga de la so abogada sobre si'l partíu socialista conocía les sos intención de celebrar l'actu
 
El miembru de Batasuna desvinculó amás el mitín d’ETA y aseguró que la propuesta plantegada nel actu taba soscrita namás pola formación política y non pola organización armada.
  
Otegi, que contó con escasu marxe daes les continues interrupciones del presidente de la sala, Fernando García-Nicolás, que nun dexó en nengún momentu que'l so discursu s'esviare a plantegamientos políticos, esplicó que la propuesta d'Anoeta foi plantegada pola izquierda abertzale n'esclusiva y opunxo'l proyectu a la propuesta de Kas, que, según indicó, sí contaba col apoyu d'ETA.

“Defensor de los medios non violentos”
D’otra miente, l'abogáu sudafricanu y espertu en mediación internacional, Brian Currin, consideró qu’Arnaldo Otegi, tendría que tar en llibertá porque foi "un defensor importante de los medios non violentos".
  
Currin realizó estes declaraciones coincidiendo col entamu na Audiencia Nacional del xuiciu contra Otegi, nel que se-y acusa d'allabanciar el terrorismu nel mitín del actu d'Anoeta celebráu en payares del 2004.
  
Nuna entrevista concedida a Radio Euskadi, recoyida por Europa Press, l'abogáu sudafricanu afirmó que l'ex voceru de Batasuna tendría que tar escarceláu. "Foi un defensor importante de los medios non violentos y foi bien consecuente nes sos opiniones, asina que tendría que tar en llibertá", señaló.
  
Amás, apuntó que, si se consideren los cargos qu'existen nesti momentu contra él, "nun se-y ta tratando de forma xusta". "Que se-y acuse d'esos cargos, ye inxusto", manifestó.