Xueces refuguen la suspensión de reglamentos llingüísticos

L'asociación Xueces pa la Democracia en Cataluña espresó'l so "fondu malestar" pol autu dictáu pol TSXC suspendiendo dellos artículos de los reglamentos d'usos llingüísticos del Conceyu de Barcelona y de la Diputación de Lleida.

Nun comunicáu, alvierten que "la interpretación que se fai d'estes normes alministratives significa dir más allá de lo que tien que ser la función de les midíes cautelares", yá que, aseguren, presume la esistencia de posibles perxudicaos y daños imposibles de reparar pol fechu de que les alministraciones usen la llingua catalana como preferente, "que non única".
  
Sorrayen que se prexulgó "la resoluicón de fondu, cosa impropia d'una resolución cautelar", con una interpretación parcial de la sentencia del Tribunal Constitucional y sin tener en cuenta la Llei de política llingüística de 1998, la Carta Europea de Llingües Rexonales o Minoritaries o la Declaración Universal de Derechos Llingüísticos, qu'obliguen a les autoridaes estatales a "adoptar les midíes de protección de la llingua propia del territoriu".
  
Amás, consideren qu'avancen elementos interpretativos de la futura sentencia, faciendo usu de la sentencia del Tribunal Constitucional sobre l'Estatut pa "llendar el derechu de los catalanes a utilizar la llingua propia nel ámbitu de Cataluña".