L’Asociación de Prensa fala d’especulación urbanística tres los despidos d’El Comercio

L’Asociación de la Prensa d’Uviéu rechazó’l despidu de 29 trabayadores del diariu El Comercio. L’órganu colexiáu de los periodistes n’Asturies cuestiona la “veracidá” del treslláu d’impresión a Benavente y fala d’especulación urbanística.

El pasáu mes d’ochobre’l Grupu Vocento, propietariu d’El Comercio, anunció la intención de desendolcar un ERE qu’afectaría “de mou inminente” a 29 trabayadores. L’oxetivu de la empresa ye treslladar la rotativa de Xixón a Benavente (Zamora).

“El diariu tuvo beneficios nel últimu exerciciu económicu, polo que nun hai nengún problema nel horizonte pa pensar nun deterioru grave empresarial al mediu plazu”, señala l’Asociación de la Prensa d’Uviéu que cuestiona la “veracidá” de treslladar la impresión a Benavnte.

Amás, l’asociación de periodistes destaca que’l zarru de los talleres va tener repercusiones “bien negatives na calidá informativa”, qu’exemplifica, ente otres, coles “necesidaes horaries del pieslle de cada edición”, daqué qu’aseguren “va terminar repercutiendo en toles secciones del periódicu”.

Especulación urbanística
“Hai insistentes rumores de que detrás del plan de futuru del periódicu ye posible que se tean escondiendo especulaciones urbanístiques con cuantiosos beneficios”, señala ‘l colectivu, que sentencia que “l'Asociación nin puede, nin tien d'aceptar un proyectu que desmembra un periódicu que ye un símbolu d'identidá pa Xixón y una garantía de pluralidá informativa pa la comunidá asturiana”.