Marta Mori, primer muyer que gana'l premiu 'Xuan María Acebal'

La escritora Marta Mori d'Arriba resultó ganadora de la decimosesta edición del Premiu de poesía en llingua asturiana 'Xuan María Acebal', que concede la Conseyería de Cultura y Turismu del Principáu.

El poemariu 'La mio voz' ye’l que-y dio’l premiu, tornando asina na primer muyer que llogra esti prestixosu galardón de les lletres asturianes al qu’optaben otros 13 poemarios y que ta premiáu con 7.000 euros.
   
El xuráu que concedió'l premiu reunióse esti mediudía na sede de la Conseyería de Cultura y Turismu baxo la presidencia de la Xefa del Serviciu de Política Llingüística, María Antonia Pedregal Montes, y cola participación de los escritores Miguel Allende, Aurelio González Ovies y Esther Prieto. La decisión adoptóse por unanimidá.
  
El testu ganador lleva por títulu 'La mio voz' y presentóse baxo'l seudónimu 'Ana D'. El xuráu destacó que se trata d'un poemariu intimista y emocionante, mui bien trabayáu estilística y formalmente, y nel que s'afilvanen imaxes que conformen un conxuntu de gran espresividá y riqueza.
  
Trayectoria
Marta Mori d'Arriba nació en Xixón en 1965. Ye doctora en Filoloxía Hispánica pola Universidá d'Uviéu y miembru de l'Academia de la Llingua Asturiana. Nesti momentu, trabaya como profesora d'Enseñanza Secundaria. Autora d'artículos d'historia, crítica lliteraria y didáctica de la llingua, tien publicaes delles obres lliteraries: los poemarios 'Pórticu' (2003); 'El tiempu de la espera' (2005); y 'L'alcordanza' (2010), asina como la colección de relatos 'Histories familiares' (2008).