L’estáu de conservación de San Miguel de Lliño desata les crítiques contra Patrimoniu

El llamentable estáu d’abandonu que sufre ún de los símbolos del Prerromanicu asturianu, San Miguel de Lliño, desató les crítiques contra la Dirección Xeneral de Patrimoniu del Gobiernu asturianu, un deterioru nel monumentu que negaron públicamente dende la Conseyería de Cultura.

La Ilesia de San Miguel de Lliño, asitiada nel monte Naranco d’Uviéu y edificada baxo’l reináu de Ramiro I nel añu 842, ta declarada pola UNESCO como Patrimoniu de la Humanidá dende l’añu 1985. L’abandonu que nos últimos años sufrió esti momunentu ye la causa de los problemes d’humedaes que tien, y que pueden provocar graves daños estructurales y la desaparición de les pintures del interior. Énte esta situación, Izquierda Unida d’Uviéu-Los Verdes, Unidá Nacionalista Asturiana y Andecha Astur, fixeron públiques les sos crítiques.

IU d’Uviéu-Los Verdes denuncia “la insostenible y inaceptable situación na que s’alcuentra un bien del Patrimoniu de la Humanidá como ye’l Prerrománicu asturianu. Pa Adolfo Saro, portavoz d’IU d’Uviéu “el Plan del Prerrománicu asturianu, anunciáu nel añu 2003, sigue durmiendo’l sueñu de los xustos” y  recordó que “el rechazu del Grupu Socialista a la enmienda presentada pol nuesu diputáu nel Congresu, Gaspar Llamazares, que pretendía incluyir una partida económica nos presupuestos xenerales del Estáu pa 2009, amosó’l desinterés na puesta en marcha de dicho Plan”. Según IU “ye necesariu recuperar con urxencia’l Plan Director del Prerrománico ellaboráu pol Gobiernu central”. Finalmente Saro dio anuncia que IU “presentará una batería d’iniciatives nel Congresu de los Diputaos” sobre “la situación del Plan, les previsiones d’execución y sobre les actuaciones inmediates que’l Gobiernu central piensa adoptar en collaboración col Gobiernu d’Asturies”.

Pela so parte Unidá Nacionalista Asturiana, al traviés del so portavoz de cultura, Ignaciu Llope, señaló como responsable d’esta situación  “a la Conseyera de Cultura, que, como parte integrante del gobiernu ta faciendo una clara la dexación de funciones en cuestiones básiques rellacionaes col patrimoniu cultural asturianu”, añadiendo que “el gobiernu asturianu ta acabante aprobar unos presupuestos onde, magar les inversiones nestos edificios, la realidá ye qu’estes xoyes del patrimoniu cultural asturianu, símbolos de la identidá colectiva del pueblu asturian úsense namás como reclamu turísticu, amosandoo una xestión pésima del nuestru patrimoniu cultural”. Por too ello dende la UNA piden “un Plan de Protección del Arte Prerrománicu Asturianu, que tien d’ellaborase cuanto primero y sobre manera conseigna-y una partida presupuestaria acordies cola rehabilitación y protección qu’han tener unes edificaciones qu’en cualquier llugar del mundu, sacante Asturies y pola mor de los pésimos xestores que tenemos, sedríen la xoya de la corona del patrimoniu cultural d’un país”.

Tamién Andecha Astur criticó l’actuación de la Dirección Xeneral de Patrimoniu y quixo recordar que’l “PSOE refugó nel Congresu, colos votos del BNG y del PNV, una enmienda presentada polos compañeros de coalición d’Andecha Astur, Esquerra Republicana de Catalunya, na Comisión de Presupuestos del Congresu de los Diputaos, qu’incluyía la concesión de tres millones d’euros pa la conservación del prerrománicu asturianu”.