El TSXA anula'l nomamientu a deu en 299 puestos del Principáu

El Tribunal Superior de Xusticia d’Asturies (TSXA) anuló’l nomamientu de 299 puestos del Principáu nomaos pol sistema dixital de nomamientos de funcionarios, mecanismu declaráu illegal nuna sentencia d’abril de 2010.

Tres esta sentencia, el Conceyu por Otra Función Pública n’Asturies señala que’l Principáu nun cumplió “de forma responsable” les resoluciones xudiciales que declaren, dende l’añu 2009, la illegalidá “del usu masivu de la llibre designación como métodu de nomamientu de funcionarios”.

Pal colectivu de funcionarios, el Principáu “entró nuna carrera allocada de rebeldía frente al Derechu, aprobando una nueva relación de puestos de trabayu'l 18 de marzu de 2009, qu'agora s'anula, na que se caltien el métodu del "deu" pa los puestos nos que yá se declaró ilícitu,  y estiéndese a dellos más, que de nuevu declárense illegales”.

Execución provisional
“Les sentencies anteriores del TSXA nun fueron executaes hasta la fecha porque'l Gobiernu asturianu, actuando irresponsablemente col dineru de los ciudadanos y ciudadanes d'Asturies, decidió recurriles en casación ante'l Tribunal Supremu”, denuncia’l Conceyu de funcionarios, qu’anuncia que va solicitar la execución provisional de la sentencia.