UNA llamenta que nun se trate'l problema del financiamientu local

Unidá Nacionalista Asturiana vien de criticar la “falta de compromisu” del PSOE y del PP col municipalismu. Pa los nacionalistes, esto refléxase n’ausencia d’un sistema de financiamientu local.

La responsable de política municipal d’UNA, Carolina Díaz, destacó que “el PSOE y el PP siguen planteando'l financiamientu municipal como una cuestión coyuntural, cuando rescampla qu'existe un déficit crónicu nesti asuntu”, lo que según la nacionalista “lleva a la crisis financiera de tolos Conceyos, porque nun tienen recursos pa encarar los servicios que la llei esíxe-yos emprestar a la ciudadanía”.

UNA critica que’l “boom inmobiliariu dexó a los conceyos tener unos recursos estraordinariamente altos polos impuestos sobre obres y viviendes”, pero qu’anguaño la crisis del lladriyu amosó “que’l modelu yera insostenible, y que los ingresos de los conceyos remanecíen de la construcción y non nun modelu de financiamientu xustu, suficiente y estable”.

Díaz tamién aseguró que’l problema de les finances municipales “vien retrasándose inxustificadamente dende va munchos años”, y sorrayó que la “cuestión de fondu” nun ye “si'l Principáu paga o nun paga en plazu unos convenios concretos, sinón l'ausencia d'un sistema de financiamientu”.

Reforma Estatutaria
En rellación a solucionar esta cuestión, UNA esixe una “reforma Estatutaria que recueya de forma clara y precisa les competencies autonómiques nesta materia, pa poder actuar políticamente énte la desidia de los distintos gobiernos centrales”.

“Una Asturies fuerte, esixe necesariamente unos Conceyos fuertes, y pa ello precisamos un alcuerdu institucional más allá de los intereses partidistes puntuales, que pasa pela reforma estatutaria que tienen paralizada de forma irresponsable”, sentenció Díaz.