14 trabayadores afectaos por un ERE d’El Comercio

14 trabayadores del diariu editáu n’Asturies El Comercio, enfréntense a un ERE que-yos podría facer perder el so empléu “de forma inminente”. La empresa quier esternalizar servicios, daqué refugáu polos trabayadores.

El pasáu 21 d’ochobre celebróse la primer asamblea tres l’anunciu de que Grupo Vocento, empresa editora de El Comercio ente otros, va presentar un ERE contra los miembros de la rotativa, el pieslle y preimpresión del diariu con sede en Xixón.

“El Grupo Vocento quier esternalizar eses secciones y trasladales a Benavente (Zamora), yá que-y sal muncho más barato”, denuncien dende l’asamblea de trabayadores afectada pol ERE. A la par, refuguen los oxetivos de la empresa y califiquen al ERE de “irracional y negativu pal futuru del periódicu y de la so plantiya”.

“Seguiremos informando, porque la llucha nun fixo más qu’entamar”, sentencien los trabayadores d’El Comercio que, tres una fuelga de firmes, van siguir desendolcando acciones pa denunciar la so situación.