Areces diz que ye necesariu “replantear” l’Estáu del Bienestar

El presidente d'Asturies, Vicente Álvarez Areces, defendió la necesidá de replantear l'Estáu de Bienestar como lo conocemos n'Europa pa poder adaptalo a les “condiciones actuales" calteniendo "lo esencial" del sistema.

"L'Estáu de Bienestar como se concibió fai dalgunos años hai que replanteaselo, calteniendo lo esencial y adaptándose a les condiciones actuales", esplicó Areces mientres la so intervención na presentación del llibru 'Una nueva gobernanza global: Propuestas para el debate, na que tamién participaron el secretariu d'Estáu pa la UE, Diego López Garrido, y l'abogáu Nicolás Sartorius, ente otros.
  
Areces defendió la xestión "dende lo local" y, anque reconoció que los ingresos de "toes" les Comunidaes Autónomes "claramente van amenorgase "ente'l 5 y el 12 por cientu" al respective de los niveles actuales, el presidente del Principáu defendió la necesidá de "caltener los derechos suxetivos" que conquistaron los ciudadanos como la Educación, la Sanidá y les ayudes por dependencia, un gastu creciente" na comunidá. "Puede faese en marcos territoriales pequeños", sorrayó.
  
El presidente asturianu reconoció, en declaraciones a los medios al términu de la presentación del llibru, que "tien qu'haber una coordinación mayor ente les Comunidaes Autónomes y l'Alministración del Estáu"  a la hora d'aplicar les polítiques actives y pasives d'empléu, como pidió'l mesmu presidente del Gobiernu, José Luis Rodríguez Zapatero.
  
A Areces paez-y “perbién" que los barones socialistes axúntense col presidente del Gobiernu nel marcu del Comité Territorial el próximu 9 de noviembre "pa ver toa esta situación xeneral". "Nun ye solo coordinar eses polítiques", esplicó, ensin entrar en más detalles. "Aplaudo que tengamos una xunta", sorrayó.
  
El presidente asturianu reconoció tar "bien satisfechu" pol fechu de que "les polítiques actives d'empléu" n'Asturies "fueron un elementu siempres de la concertación social", lo que dexó que tea en "una situación relativamente meyor que'l restu del país", recordando que la so comunidá ye la segunda menor empeñada de toes y con una tasa de desempléu 4 puntos porcentuales per debaxo de la media española.
  
"Tenemos inda un fuerte desempléu. Hai qu'actuar sobre él, pero en concencia eses polítiques fueron un elementu sustantivu de la concertación social y tou lo que sía saca-yos rendimientu, saber invertir meyor, acoplales con polítiques de formación adecuado...", concluyó Areces.

Futuru d'Areces  
Areces, que nun va repitir como candidatu del PSOE nes próximes elecciones autonómiques, estimó la “reconocencia del trabayu de munchos años" que desenvolvió al frente del Principáu y adelantó que piensa "siguir trabayando en munchos frentes" pese a abandonar la primer llínea de la política, incluyíu como "collaborador desinteresáu" de la Fundación Alternativas.
  
Nesti sentíu, adelantró que va participar na próxima ellaboración d'un llibru, tamién editáu pola Fundación Alternativas, sobre "polítiques rexonales europees y el papel de les rexones n'Europa".