UNA apoya la iniciativa del BA p’abolir el maltratu animal

Unidá Nacionalista Asturiana vien d’apoyar la iniciativa del Bloque por Asturies p’abolir el maltratu animal n’Asturies. Afirmen que si la Proposición de Llei sal alantre sería una victoria pa toles persones que lluchen nesi sen.

El voceru de medioambiente d’UNA, Tino Fernández, foi l’encargáu de treslladar l’apoyu d’UNA a la iniciativa p’abolir el maltratu animal presentada pol diputáu del BA, Roberto Colunga, na Xunta Xeneral. Fernández consideró que la oposición a les corríes de toros ye daqué “mayoritariu” na sociedá asturiana y calificó de “perpositivo” qu’estes posiciones tengan el so reflexu nes instituciones.

“La presentación d'esta proposición de Llei ye una mui bona noticia, porque la so aprobación supondría la eliminación d'una de les mayores tortures animales qu'esisten”, señala Fernández, que recordó qu’UNA apurrió nesti sen “delles iniciatives que se desendolcaron nos últimos años”, al traviés de mociones y acciones reivindicatives.

Les mociones en Xixón o Carreño pa declaralos conceyos antitaurinos, la iniciativa conxunta con Anadel en Corvera y la campaña fecha en Xixón pa recordar que’l antitaurismu xixonés remóntase a Xovellanos, son dalgunos de los fechos qu’UNA desendolcó contra la tauromaquia.

Dificultaes nel procesu
El voceru nacionalista de medioambiente sorrayó tamién les dificultaes pa l’aprobación d’esta iniciativa. “El restu de grupos parllamentarios van intentar entemecer alderiques y comparanos col casu catalán, escaeciéndose qu'Asturies tien una vida política propia y qu'esti alderique ye anterior a l'abolición de los toros en Cataluña”, criticó Fernández.

Pa Fernández, comparar col casu catalán ye “desvirtuar” l’alderique y sentenció que “ye básico que posiciones mayoritaries de la sociedá asturiana, como ye la de querer abolir los toros, tengan el so reflexu nes instituciones asturianes, independientemente de lo que s’opine en Madrid o en Barcelona”.