Meyor fuera que nos equivocáremos

Consciente de qu’a naide-y presta adelantase a les males noticies, denunciar intenciones, destacar les contradicciones ente les declaraciones públiques y lo necio de los fechos. Segura de nun apostar a los dados nesti casu sinón cenciellamente sacar conclusiones de datos, puedo dicir, con too, qu’oxalá tuviéremos equivocaos.

Y ye que dende l’entamu les señales taben clares, el futuru de Juliana pintaba bien negro cola xestión que se taba faciendo dende distintes instituciones. Asina, Unidá Nacionalista Asturiana yá denunció les promeses incumplíes per parte de la SEPI na privatización del astilleru, al quedar Juliana fuera de la empresa Navantia, llugar que paecía taba meyorando les perspectives de futuru al astilleru. La mesma sensación de qu’a costafecha taba optándose pola peor opción pal astilleru atopámosla otra vegada na venta a Vulcano, y nun foi ésta una conclusión esclusiva d’UNA, yá que los mesmos datos de los alministradores concursales destacaben que los principios de la venta de Juliana facíen invidable la esistencia de la mesma. Nel mesmu informe concursal apaecíen les dudoses imputaciones de gastos de Vulcano escontra la so filial xixonesa.

En dambos casos l’actitú tanto del Principáu como del Conceyu foi mirar pa otru llau.
Namás dos meses dempués, en xineru de 2010, llegaba’l segundu despropósitu relativu a la xestión del astilleru. Un aval que xubía a 32 millones d’euros procedente de perres públiques pagaba l’incumplimientu de plazos na entrega del barcu 532, barcu que por cierto derivaba del desplazamientu de la carga de trabayu de Juliana a los astilleros de Vulcano en Vigo.

Por too ello’l 7 d’abril de 2010 solicitamos que’l casu Juliana fuere lleváu pa debatise nel Plenu municipal, esplicando asina a la ciudadanía’l destín final de les inversiones pa “reflotar” Juliana según les propuestes de reactivación o nel so casu reconversión del sector. Nin tal plenu se celebró nin los ciudadanos y ciudadanes sabemos lo que pasó coles perres nin coles posiciones de los nuestros representantes nesti tema.

Pela cueta les úniques posiciones qu’hasta’l momentu se caltuvieron fueron les de los trabayadores del sector naval de la ciudá, trabayadores que lleven denunciando les intenciones de pesllar los astilleros muncho primero que cualesquier organización, trabayadores que lleven oyendo promeses incumplíes tan sangrantes como la qu’aseguraba la recolocación de los profesionales de Duro Felguera nel mesmu Juliana y agora atopen la sorpresa de los sos representantes municipales como única respuesta.

Lo cierto ye qu’a día de güei namás puede falase de la muerte anunciada d’un sector del que dependíen non solo los emplegos directos sinón tamién cantidá d’empleos indirectos de la ciudá, ensin que se conoza entá alternativa creíble dala. Dempués van dicinos que la crisis ye menos fiera n’Asturies, que la perda de población n’edá de trabayar ye una lleenda y que les obres faraóniques entamaes pol Principáu van asegurar el granu. Na nuestra mano ta consumir esti productu o facer daqué por espertanos d’esti coma llargu ya inducíu.