Areces d’alcuerdu con Fernández n’aplicar el modelu de les cuenques

El presidente asturianu, Vicente Álvarez Areces, mostró "plena sintonía" coles declaraciones del candidatu del so partíu a les próximes elecciones, Javier Fernández, nes qu'apostaba por "lo que se fai nes cuenques" como "modelu" p'Asturies.

  
Areces ofreció güei una rueda prensa tres la firma del conveniu de collaboración en materia social, ambiental y cultural con La Caixa. Nel actu preguntáron-y pola intervención del so compañeru de partíu nun actu políticu celebráu ayeri en Mieres.
  
Asina, el presidente mostró "plena sintonía política y concordanza con tolo que diga (Fernández) nun ámbitu de mitinos". Calcó na "unidá nos criterios y na manera d'actuar na política" de los socialistes, amás d'en "la manera d'enfocar los problemes d'Asturies".
 
"Los socialistes asturianos tamos mui uníos, y eso ye un capital que, na situación na que vivimos, los ciudadanos aprecien", afirmó, amás de referise al contraste  qu'ofrez "con otres situaciones", n'alusión a velar a les polémiques sobre la posible candidatura autonómica de Francisco Álvarez Cascos pol Partíu Popular.
  
Según Areces, "les comarques mineres tuvieron un fonda tresformación que tien que siguir nel futuru, y tamién toa Asturies". Esti modelu de crecimientu, esplica'l presidente, "afectó a toa Asturies y dio mui buenos resultaos, polo que me siento bien satisfechu".

Concertación Social
Aprovechó la so intervención pa resaltar el modelu de "concertación social" con empresarios y sindicatos, que lleva funcionando n'Asturies doce años. "Les polítiques de vivienda acordámosles, igual que les polítiques industriales o de formación", destacó, puntualizando que "namás nesta llexislatura l'últimu acuerdu de concertación implica 3.600 millones d'euros".
  
Asina, según Areces los empresarios y sindicatos "falen el nuesu propiu discursu", y eso ye "un bagaxe que tien Asturies y tenemos que sostener".