Día del Llibru Asturianu

L’Sporting cayó elimináu de la Copa pol Athletic

|

Nun pudo ser. L’Sporting de Xixón cayó elimináu nos cuartos de final de la Copa del Rei por un 1-2 frente al Atheltic de Bilbao nuna eliminatoria mui igualada y na que, otra vez, graves errores defensivos y na portería, xuníos a un arbitraxe mui a favor de los vascos, torgaron la presencia asturiana nes semifinales.

Y eso que’l partíu  nun pudo entamar meyor, por cuenta qu’enantes de cumplise’l primer minutu de xuegu l’Sporting marcaba gracies a un disparu na frontal del area de Carmelo. Con esti gol los asturianos taben en semifinales, por mor que’l resultáu na ida fue d’empate a cero. Los xixoneses dominaron nesti tiempu, practicando un bon fútbol y teniendo delles oportunidaes de gol. Sicasí, nun balón al área de los bilbaínos xunta a una mala salida del porteru Sergio Sanchéz casi propicia’l primer gol visitante, si nun fuere porque Carmelo sacó’l balón xustu debaxo’l llargeru. La xugada clave llegaría a los pocos minutos nun derribu claru a Diego Castro nel área. L’arbitru, qu’ente la duda siempre barría pal Athletic, ignoró la xugada. La otra xugada clave de la primer parte llegaría nel 41 cuando Gabilondo marcó’l primer gol visitante, colando‘l balón perriba del porteru xixonés que quedó a media salida.

L’entamu de la segunda parte foi letal pal Sporting, por cuenta del gol de cabeza que David Lopez, llibre de marca, metió nel mintu 51.  A partir d’ehí’l marcador nun diba movese más. L’Athletic dominó’l xuegu y los asturianos nun fueron quien a reponese del gol visitante.

A pesar del resultáu de la eliminatoria, lo mesmo na ida que na vuelta los xixoneses dexaron en llínies xenerales un bona impresión. Agora toca pensar namás na Lliga.

Ficha Técnica

Sporting: Sergio Sánchez, Sastre, Iván Hernández, Neru, José Ángel, Michel (Barral m 52), Matabuena (Diego Camacho m 45), Luis Morán (Omar m 74), Carmelo, Diego Castro y Bilic.

Athletic Bilbao: Iraizoz, Iraola, Aitor Ocio, Amorebieta, Koikili, David López (Gurpegui m 89), Orbaiz, Javi Martínez, Ion Vélez (Toquero m 83), Gabilondo (Yeste m 45) y Llorente.

Goles: 1-0 Carmelo (m 1), 1-1 Gabilondo (m 41), 1-2 David López (m 51)

Árbitru: González Vázquez. Sacó tarxetes amarielles a Neru (m 37), Michel (50), Carmelo (m 56), Yeste (m 57), Barral (m 60), David López (m 64), Javi Martínez (m 69) y Omar (m 90)

Contador Estadistiques