Importantes victories de deportistes asturianos nel fin de selmana

El fin de selmana dexó importantes victories pa los deportistes asturianos. Fernando Alonso, el ciclista avilesín Rubén Ruíz y l’Uviéu firmen los triunfos; mentantu que’l Sporting perdió’l domingu énte’l Getafe.

El pilotu asturianu de Ferrari Fernando Alonso colocóse llíder con 231 puntos del Mundial del Gran Premiu de Corea. Tamién destacó l’abandonu de los sos rivales Mark Webber y Sebastián Vettel, del equipu Red Bull.

Nel fútbol, el Real Uviéu ganó 4-1 a La Muela, nun partíu vencíu gracies a la remontada nos momentos finales del xuegu. Con esta nueva victoria, l’equipu de la capital lleva yá cinco xornaes ensin perder.

Non tan bona suerte tuvo’l Sporting de Xixón. Los roxiblancos perdieron 3-0 col Getafe, nun partíu marcáu poles baxes destacaes d’un y otru bandu. L’equipu xixonés ocupa’l puestu 14 na clasificación de la Lliga BBVA, con ocho puntos algamaos.

Rubén Ruíz en ciclismu
Per otru llau, el ciclista avilesín Rubén Ruíz rexistró’l domingu una marca de 43,078 kilómetros nuna hora, récord d’España na categoría máster 30. Foi nel velódromo de Luis Puig, en Valencia.