Soro: “Oxalá Asturies tuviera representada n’Espacio Plural”

Jose Luis Soro (Zaragoza, 1966) ye’l Vicesecretariu Xeneral d’Acción Política de Chunta Aragonesista. El so partíu forma parte d’Espacio Plural, un nuevu proyectu políticu estatal d’izquierda, ecoloxista y de respetu a la plurinacionalidá.

El pasáu 25 de setiembre presentóse en Zaragoza el proyectu políticu Espacio Plural, pero la so xestación vien d’antes ¿Podría falar de les causes que dieron pasu a Espacio Plural?
Va yá muncho tiempu qu’ente les diferentes comunidaes autónomes, diferentes partíos que compartimos unos valores comunes como los valores de la izquierda, una visión plurinacional del Estáu, los valores del ecoloxismu, del feminismu… llevamos planteando la necesidá d’articular un espaciu común de la izquierda qu’axuntara toos estos valores.

Esti espaciu nun significaba crear un nuevu partíu políticu, sinón que tolos partíos políticos qu’iniciábemos esta alternativa calteníemos la nuesa soberanía y llibertá d’acción política nes nueses comunidaes autónomes. Pero sí que veíemos que yera necesariu articular d’una forma visible que tábemos compartiendo esos planteamientos y que teníemos un llugar d’alcuentru. Tres varios conceyos decidimos crear Espacio Plural que, como dicía enantes, nun ye un nuevu partíu políticu, nun ye una coalición electoral; ye un espaciu d’alcuentru, un llugar de reflexón de partíos que compartimos esos valores que comentaba.

Na llínia de lo que comentes, la definición d’Espacio Plural ye “Foru d’alderique” ¿Pue explicar un poquiñín más en qué consiste esa definición?
Lo que queremos dexar claro ye lo que nun somos y, repito, nun somos un partíu políticu únicu, cada partíu qu’integra Espacio Plural caltién la so soberanía; tampoco somos una coalición electoral. Somos daqué que pa nós ye mui importante, porque munches vegaes el gran problema que tenemos énte polítiques neolliberales  - como les qu’aplica el gobiernu Zapatero- ye que ye necesariu que la izquierda, que quienes compartimos esa visión plurinacional del Estáu, que quienes tamos convencíos que n’época de crisis ye más necesariu que nunca defender la tierra; tengamos un llugar común. Un espaciu pa que la nuesa voz se puea sentir, un llugar pa coordinanos y pa poder dir faciendo propuestes en común.

Ye un problema porque’l bipartidismu atroz qu’hai nel Estáu español fai que postures, alternatives, planteamientos como los defendidos polos que formamos Espacio Plural; se queden ensin voz, ensin presencia pública y ensin esi altavoz que son los medios de comunicación. Por eso yera necesariu articular esti espaciu d’alcuentru, d’alderique, p’articular un espaciu a la izquierda del Partíu Socialista. Porque vemos que munches persones se sienten ensin un referente políticu; y cubrir esi referente ye polo que naguamos.

Falando de referentes… na prensa especulóse con que ustedes presentaben una alternativa a Izquierda Unida ¿Qué opina d’esta etiqueta? ¿Cree agotáu’l modelu d’esta fuerza política?
Yo nun voi entrar a opinar sobre Izquierda Unida. Ellos tán faciendo un procesu de refundación y nós con IU hai cuestiones que compartimos y otres que non, como la concepción del Estáu. Espacio Plural nun se fai contra naide, pero ¿Qué ocurrió tamién?, pues que nós en xunu ficimos públicu que’l 25 de setiembre díbemos a presentar Espacio Plural en Zaragoza y dempués IU decidió celebrar esi mesmu día el so Conseyu Políticu equí en Zaragoza. Intentaron contraprogramanos, pero ellos sabrán. Nós nun entramos no que cada partíu fai, ellos sabrán, nós deseamo-yos muncha suerte na so refundación y nun creamos Espacio Plural contra ellos. Tampoco naguamos por robar l’espaciu de naide, porque la izquierda nun ye propiedá de naide.

Nós simplemente llanzamos esi mensaxe d’unión, porque tamos convencíos de que ye imprescindible la unión de la izquierda; d’esa izquierda que, amás de los valores clásicos, tamién comparte valores d’otros proyectos como los que yá dixi.

Presentásteis Espacio Plural fai casi un mes ¿En qué procesu alcuéntrase agora Espacio Plural?
Tendremos un nuevu alcuentru públicu sobre avientu o xineru, precisamente porque toos respetamos el trabayu de los demás compañeros – préstanos dicir que somos una cooperativa política – y agora mesmu son les elecciones en Cataluña, qu’afecta a Iniciativa per Catalunya, ún del los partíos que forma Espacio Plural. Entós nun hai nada paralizao, pero agora hai unes prioridaes polítiques y entendemos qu’ún d’esos partíos tien esa prioridá.

Namás que pasen les elecciones nos volveremos a aconceyar pa siguir planteando cuál ye la nuesa siguiente presencia pública. Amás, tamos sintiendo que se ta moviendo muncho la cuestión n’otres comunidaes autónomes y hai munches persones y munchos colectivos que podríen tar interesaos en participar nesta idea.

Yá que cites a les organizaciones ¿Qué partíos formen Espacio Plural? ¿Cree que van sumase nueves sigles?
Primero dexar claro qu’Espacio Plural nun ye una plataforma de persones, sinón una plataforma política de partíos políticos. Pel momentu, amás de Chunta Aragonesista, tán Iniciativa per Catalunya-Verds; Iniciativa del Poble Valenciá: Iniciativa d’Esquerres, de Baleares; Nueva Canarias; y d’Andalucía Paralelo 36, que ye una plataforma qu’axunta a xente de la izquierda, del andalucismu y del ecoloxismu.

L’aspiración ye qu’haiga más partíos que puean incorporase nel futuru a Espacio Plural. Hubo más partíos invitaos al actu de presentación, a los que-yos agradecemos muncho la so presencia como observadores de lo que tábemos echando a andar. Pa nós yera importante echar a andar, porque la situación a nivel estatal ye cada vuelta peor, y echar a andar pronto los que formábemos el proyectu nel momentu. Pero yá te digo qu’aspiramos a qu’Espacio Plural puean formalu munches más organizaciones que compartan los nuesos valores.

Hai que decir tamién que tamos faciendo un “esperimentu” y ye que nun tamos creando una organización típica: nun tenemos un Conseyu de Dirección, nun tenemos un Presidente, nin un Secretariu Xeneral, nin nada d’eso. Furrulamos d’una forma horizontal. Les decisiones de que se vayan incorporando más partíos habrá que dir tomándoles nel senu d’Espacio Plural.

Unidá Nacionalista Asturianista foi una de les organizaciones invitaes...
Sí. Ente los partíos que tuvieron tuvimos el placer de cuntar con Unidá Nacionalista Asturiana. Chunta Aragonesista tenemos mui bona rellación con UNA y oxalá Asturies tuviera representada n’Espacio Plural, como otros territorios o otros partíos dientro de dalgún de los territorios que yá tán representaos. Cuantos más seamos, la idea va furrular meyor.

Amás como defendemos qu’el pluralismu nun ye un problema, sinón un valor, equí nun facemos análisis de pureza. Equí de lo que se trata ye de partíos d’izquierda; de partíos nacionalistes o que, a lo menos, tengan una visión federal y de respetu a la plurinacionalidá del Estáu; de partíos ecoloxistes… eso ye lo que naguamos construir. Construir y ampliar l’horizonte. Y bono, nun ye casual; los partíos que tuvieron presentes nel actu de presentación, son los partíos colos que nos prestaría cuntar nel futuru.   

Falasti del ecoloxismu. Na prensa tamién se podía lleer qu’esistía rellación con Equo, el proyectu políticu ecoloxista del ex director de Greenpeace nel Estáu español…
Sí. Enantes citaba que se tán viviendo varios procesos; eso ye bono. La izquierda ta ebullendo y, xunto a Espacio Plural y la refundación d’Izquierda Unida, ta moviéndose nel ecoloxismu el proyectu d’Equo. Son proyectos paralelos; nun ye lo mesmu Espacio Plural qu’Equo, anque sí que ye verdá que nos miramos ente nós.  Sicasí, ye más la prensa la qu’une los dos procesos, porque son procesos independientes, anque compartamos parte del nuesu ideariu.

Nós nun tenemos una fueya de ruta y nun nos negamos a nada; diremos viendo. Vamos ver como se desarrolla Equo, como se desarrolla Espacio Plural; pero repito que son dos procesos en paralelo y ensin interferencies nin coordinación. Na mio opinión, la crisis política, ecolóxica y social que tamos sufriendo ye la que fai que se tean xenerando estos movimientos. Hai otres comunidaes autónomes onde tamién se ta moviendo’l tema, y camiento que ye la situación, la deriva neolliberal del Estáu, la que fai que se vayan moviendo estes cuestiones. Nos diremos dando tiempu toos y yá veremos.

Acabes de citar la crisis política y ustedes afirmen nos sos principios que “Otra izquierda ye posible”. ¿Cómo se construye esa izquierda? ¿Qué propuestes y polítiques debería desendolcar?
Ser coherente. Dende Chunta Aragonesista lo que decimos ye que nun queremos un modelu económicu pa salir de la crisis. De la crisis saldremos pero, cuando acabe la crisis, queremos un nuevu modelu económicu p’afrontar el futuru. Tamos en desalcuerdo de les polítiques actuales y proponemos una política fiscal progresiva y progresista; impuestos medioambientales; una reforma llaboral nel sentíu contrariu, porque nun se trata d’abaratar el despidu, sinón d’acabar cola temporalidá del mercáu llaboral; una política medioambiental basada na cultura de los nuevos valores del agua, y non en tresbases… hai muncho camín que facer.

En temes llaborales, Espacio Plural firmó un manifiestu d’apoyu a la fuelga xeneral del 29-S. Nesti nuevu procesu ¿Caltienen rellaciones con sindicatos que defiendan un modelu alternativu al de CC.OO y UXT?
Pues falándote de Chunta Aragonesista, tenemos rellaciones con Comisiones y UXT – que tuvieron presentes nel actu de presentación d’Espacio Plural- pero tamién tenemos mui bona rellación con otros sindicatos, minoritarios nel bon sentíu. Por exemplu OSTA, un sindicatu nacionalista mui prósimu a CHA, o CGT. De fechu n’Aragón planteáronse dos manifestaciones el día de la fuelga xeneral – la de CC.OO y UXT y la de OSTA, CGT y otres organizaciones- y tuvimos presentes nes dos. Amás, los partíos políticos nun tienen que facer sindicalismu; los partíos políticos tienen que facer política, los sindicatos sindicalismu, y lo que facemos nós ye apoyar esa llucha sindical.

Toes estes coses que me comentes faen reafirmame na opinión de que la situación aragonesa tien abondes semeyances cola situación asturiana
Ente Aragón y Asturies hai un paralelismu tremendu. Somos unos grandes desconocíos, desgraciadamente. Nel Estáu español namás qu’importa lo que pasa en Cataluña, nel País Vascu, en Madrid, y los demás nun contamos. Paecémonos muncho: n’Aragón tenemos al rodiu d’un millón doscientos mil habitantes; tenemos una situación llingüística mui complicada; y creo que podríemos deprender muncho los aragoneses de los asturianos y viceversa. Ye una pena que nun tengamos una mayor rellación, porque creo que somos dos comunidaes autónomes que comparten dalgunes realidades mui clares.

Al marxe d’esti incisu y yá p’acabar. Espacio Plural citó que “ambiciones toes y llímites nengún”, y el llímite que más intriga ye saber si Espacio Plural va concurrir a les elecciones. Según me comentaste ta too nel aire, pero ¿Habría posibilidá de qu’Espacio Plural se presentara a les elecciones?
Nun voi escurrir el bultu y voi entrar a fondu nel tema. Llóxicamente cada partíu va presentase coles sos sigles na so Comunidá Autónoma y nos sos Ayuntamientos. Otra cuestión posible ye que planteemos, enantes de les elecciones municipales, dalgún tema de coordinación y furrulamientu municipal, pero nun ta decidíu y nun nos vamos a presentar en coalición a les municipales.

Nes elecciones xenerales, Chunta Aragonesista va presentase como Chunta Aragonesista a les trés provincies aragoneses. Otra cuestión diferente ye que si esto avanza, si va too bien, si vamos construyendo esi espaciu común… ¿Por qué nun podemos pensar nun grupu parlamentariu propiu nel Congresu? Esa ye otra cuestión, pero CHA y los demás compañeros vamos presentanos per nós mesmos nes nuestres comunidaes autónomes. Otra cosa ye que se busquen fórmules pa que se visualice esi espaciu común que tamos construyendo.

Pa les elecciones europees. Pa elles ye necesariu qu’haiga una coalición electoral, porque la circunscripción ye estatal. ¿Podría dende Espacio Plural formase una coalición pa les europees? Pues yá veremos. Claro que sería posible, tolos partíos que tamos n’Espacio Plural tamos en diferentes coaliciones, polo que sería posible. Finalmente, lo que se visualiza ye una gran coalición de la izquierda nacionalista, otra coalición de la derecha nacionalista. Pues esto podría ser un xermen para crear una gran coalición, pero yá diremos viendo, porque una coalición europea necesita muncho tiempu de preparación.

Lo importante ye ir construyendo ensin ponese llendes. Nun te pueo asegurar nada pero, llóxicamente, ver veremos ente los partíos que llevamos tiempu trabayando xuntos, qu’aldericáremos, que tengamos rellación, y que los nuesos afiliaos tengan rellación.