El Tribunal Supremu decide por 22 votos escontra siete que nun se pue oxetar a Educación pa la Ciudadanía

|

El Plenu de la Sala Tercera de lo Contencioso-Alministrativo del Tribunal Supremu acordó, por 22 votos a favor y siete a la escontra, refugar los recursos presentaos por pas asutrianos a los que'l Tribunal Superior de Xusticia d'esta comunidá denegó'l derechu a la oxeción de conciencia a l'asignatura d'Educación pa la Ciudadanía y los Derechos Humanos (EpC), según informaron fontes del Altu Tribunal, qu'especifica que los derechos, referentes a la Educación Secundaria, nun lesionen el derechu fundamental a la educación relixosa de los sos fíos
.
"El Plenu de la Sala llegó a la conclusión de que nos casos presentaos nun existe'l derechu a la oxeción de conciencia y de la mesma manera estableció que los decretos examinaos, dambos referentes a la Educación Secundaria, por sí mesmos nun algamen a lesionar el derechu fundamental de los pas pa que los sos fíos reciban la formación relixosa y moral que tea d'acordies coles sos propies convicciones", señala'l TS nun comunicáu.
 
Según les mesmes fontes, el Supremu entendió que los reales decretos que regulen esta asignatura nun lesionen el derechu de los pas a ellixir la llibre educación de los fíos.
 
La decisión tomóse tres 20 hores d'intensu alderique pal que foi necesario que'l plenu de la sala s'aconceyare en sesiones de mañana y tarde dende'l llunes. A lo último, 22 maxistraos apoyaron esta resolución, frente a otros siete que la refugaron, mientres qu'ún de los xuces nun foi a la votación.
 
Nos próximos díes, l'Altu Tribunal va dar a conocer el fallu cola resolución, previsiblmente colos siete votos particulares, que salva l'asignatura y confirma les tres resoluciones del Tribunal Superior de Xusticia d'Asturies, y revoca l'adoptada pol d'Andalucía, que falló en favor d'unos pas a los qu permitió oxetar y con un fíu que quedaba exentu d'evaluación.
 
TRES RECURSOS D'ASTURIES Y ÚN D'ANDALUCÍA
 
Per un llau, l'Altu Tribunal basó la so decisión tres decidir sobre tres sentencies del Tribunal Superior de Xusticia d'Asturies, que denegaben el derechu d'oxeción a dellos pas d'esta comunidá por considerar que l'asignatura nun incumple derechos fundamentales. De la mesma manera, esti tribunal indicaba que pal desarrollu de la materia túvose en cuenta l'autonomía de los centros p'adautar los conteníos al so ideariu, asina como la llibertá de cátedra del profesoráu.
 
El Supremu tamién tuvo de facer frente demientres estes tres xornaes al recursu eleváu pola Xunta andaluza, que s'oponía a la decisión de los maxistraos del Tribunal Superior de Xusticia d'esta comunidá, que fallaron a favor d'unos pas, a los que permitió oxetar y dexó que'l so fíu quedare exentu d'evaluación. El TSXA alegaba que los conteníos que fixa'l Gobiernu "incumplen el derechu de los pas a educar a los sos fíos na formación relixosa o moral d'acordies coles sos propies convicciones".

Contador Estadistiques