Colunga presenta una Proposición Non de Llei ecoloxista

El diputáu del Bloque por Asturies y voceru del Grupu Parllamentariu Mestu, Roberto Colunga, presentó una Proposición Non de Llei na Xunta Xeneral en defensa del incrementu de la reducción, recoyida y reciclaxe de residuos.

Asturies xenera cada añu más de 500.000 tonelaes de residuos n’hogares, casi 500 kilos por habitante y añu. D’ello namás que se recicla el 9’9% y, según el Bloque por Asturies, “deberiemos tar nel 50%”

“El recicláu y la reutilización son la única solución sostenible, que nun presenten contraindicación dalguna, favorecen al mediu ambiente y a la salú, y son una fonte de creación d'empléu y riqueza”, argumenta’l BA en defensa de la Proposición Non de Llei presentada pol diputáu Roberto Colunga a la Xunta Xeneral.

Nesta proposición, Colunga encamienta al Gobiernu del Principáu delles midíes nesti sen. Aumentar los actuales niveles de recoyida selectiva y reciclaxe, más puntos llimpios, diseñar y desendolcar un Plan de Xestión de Lodos pa evitar vertíos o crear un sistema eficiente de recoyida d’aceite doméstiu; son dalgunes de les propuestes.

El Bloque por Asturies señaló tamién que “el recicláu y la reutilización son una fonte de creación d’empléu y riqueza”.