Hermanos Valleroso, un pasu más na tonada

Los hermanos Valle Roso, Marisa y Fernando, tienen ya nel mercáu el so primer cd, entituláu “Un pasu más”. Nél los dos cantantes de tonada dexen ver les sos cualidaes como cantantes, rompiendo un poco, pero solo un poco, los esquemes típicos de la toanda asturiana no tocante al estilu, ritmu o acompañamientu musical. 

Marisa y Fernando, anque son bien mozos -nacieron en Llangréu en 1987 y 86 respectivamente- lleven nesto de la música casi diez años. Entamaron allá pel añu 2000 col conseyu y ayuda de Alfredo Canga, cantante de muncha sona na música asturiana. A partir d’ehí los hermanos siguen el camín habitual del cantante de tonada asturianu, participando en milenta festivales, concursos y amueses. Nesti andar pelos escenarios Marisa y Fernando van puliendo la so voz, con hores d’ensayu, viendo a otros cantantes y escuchando a los referentes de la tonada. Enseguida algamen premios, reconociéndolos como punta de lanza de la xeneración nueva de cantantes de tonada, xuntando los sos nomes a otros -daquella promeses- como Anabel Santiago o Liliana Castañón.

Con esti currículum y trayectoria, los hermanos Valle y Roso entanen a participar en grabaciones varies, a veces conxuntamente y otros por separáu. Y ye que los dos hermanos pratiquen un estilu de tonada tradicional, dacuando un poco escaecíu, como ye la canción dialogada. Asina, en 2004, participen na grabación del recopilatoriu “Cantares de mina”, o na recopilación d’AICA (Asociación d’Intrérpretes de la Canción asturiana), interpretando canción dialogada.  Marisa tamién intervien nel cd colectivu “Con voz de muyer”, del Institutu Asturianu de la Muyer.

Na actualidá acaben de sacar al mercáu el so primer discu conxuntu, dalgo previsible y esperáu por aquellos que veníen siguiendo la carrera d’estos dos mozos. Nel discu que lleva por títulu “Un pasu más”, Marisa y Fernando esploten tol potencial que tiene nel gargüelu, con cantares d’estilos diferentes. Pero sobre too hai que facer rescamplar que deciden facer lo que diz el títulu, dar un pasu más, y facer canción asturianu de xeitu un poco difeente al normal, habitual o tradicional, como se quiera dicir. Asina, primero de nada, comentar que l’instrumentu principal d’acompañamientu ye’l pianu, y non la gaita como suel ser vezu, que tamién hai. D’esta manera el pianu de Xaime Arias ta presente en casi tolos cantares –en 10 de los 13 cortes del discu- colo que se convierte xunta los hermanos nel protagonista del discu. L’acompañmientu de tonada con pianu nun se puede dicir que seya daqué inédito, nin agora nin fai décades, pero nun ye dalgo que se vea per ende fácilmente, colo que-y da un soplu de frescura sonoru a los discos de toanda. Amás d’esto, nel cd tamién podemos topar un tema nel que los hermanos van acompaños por toa una banda nun cantar que llega a sonar con xeitu brasileñu. Con too y con ello, a pesar d’estes desviaciones sobre la tradición, el xeitu que ponen pa cantar Marisa y Fernando nos más de los temes ta mui averáu al de la ortodoxia de la tonada asturiana, amosando una voz educada que sabe caltener la esencia de lo que cualesquier persona puede reconocer como canción asturiana. Preba d’esto ye que nel discu podemos escuchalos acompañaos namás por una gaita o pol pianu, dexando la voz casi desnuda delantre de cantares tan importantes nel repertoriu asturianu como La Soberana, Onde vas de madrugada o Nun quiero coyer la flor. Finalamente dicir que, como yera d’esperar y casi sobra decilo, la calidá de los temes dialogaos ye pergrande, y nótase que ye un palu que los Roso Valle dominen dafechu.

El cd salió a la cai gracies a la casa de discos L’Aguañaz, que lu grabó nos estudios Tutu de Corvera, cola producción y asesoramientu d’otros dos hermanos, Xaime ya Ismael Arias