BA pide la creación de puestos específicos de profesor d'asturianu

El Grupu Parlamentariu del Bloque por Asturies presentó güei una moción na Xunta Xeneral pa que'l parlamentu autonómicu solicite al Ministeriu d'Educación la creación de puestos específicos de profesor de llingua asturiana.

L’oxetivu ta n'enseñanza primaria y secundaria, con profesoráu escoyíu por concursu públicu. Sería una medida transitoria hasta que s'aprobare la especialidá docente, aspectu que tamién demanda la propuesta.
  
El parlamentariu de la organización, Roberto Colunga, y el voceru del Bloque, Rafael Palacios, ofrecieron güei una rueda prensa pa presentar esta moción, que surde tres la sentencia del Tribunal Superior de Xusticia d'Asturies qu'anula la ratio mínima d'alumnos pa crear grupos de llingua asturiana na Educación Secundaria, establecida hasta ahora n'ocho.

Palacios negó que l'aplicación d'esti fallu conlleve un espilfarru económicu, como caltuvo ayeri'l conseyeru d'Educación, Herminio Sastre, mientres la so comparencencia na comisión de la so cartera.
  
Normalizar la situación
La propuesta fai una llarga esposición d'argumentos llegales y xurídicos, ente los que destaca la LOE y la Llei de Promoción y Uso del Asturianu, pa pidir la creación de la especialidá de llingua asturiana. Colunga recordó que "tenemos más de 200 profesores de llingua, y más de 20.000 alumnos dando clase d'asturianu, ye'l momentu de normalizar esta situación", señaló. Asina, recordó que correspuende al Gobiernu asturianu facer esta solicitú al Estáu.
  
Mientres llega'l momentu d'aprobase la especialidá, y de manera transitoria, el Bloque pide la provisión de puestos de profesor de llingua asturiana. Tales puestos cubriríense, "al traviés de les RPT del personal docente puestos específicos destinaos a la impartición de la llingua asturiana, conforme al artículu 30 de la Llei 3/1985, de 26 d'avientu, d'ordenación de la función pública de l'Alministración".

Convocaríense asina bolses de trabayu que, al contrario de les que yá existen, seríen esclusives de Llingua Asturiana y dexaríen a los docentes d'esta materia n'igualdá de condiciones col restu.
  
Preguntaos pola argumentación del Conseyeru, según la qu'existe un informe del Estáu qu'impide la creación de la especialidá, ambos representantes del Bloque fueron tayantes: "ye falso". "Esi documentu", señaló Colunga, "lo único que diz ye que tien que ser la Comunidá Autónoma la que pida la creación de la especialidá".

Ratio
Palacios negó, pela so parte, que l'anulación de la ratio d'ocho alumnos, y l'aplicación d'estes midíes suponga  un "espilfarru". "Va ser una fuente de xeneración de puestos de trabayu, y tolo que tenga que ver con inversión en cultura y educación nun pue ser un espilfarru", señaló.
  
Negó amás que la sentencia seya "recurrible", ante la intención del conseyeru de recurrir. "Lo que ye recurrible ye la propia llei", añadió.
  
Amás, satisfízose por que la sentencia acabe con "la picaresca". "En munchos institutos llamaba algún padre preguntado pola asignatura de llingua, y contestáben-y que'l so fíu nun se podría matricular porque sólo taba él, y al siguiente que llamaba volvíen a dici-y lo mesmo, y asina socesivamente", acabó.