Arte y reivindicación llingüística van de la mano en Nava

La Xunta pola Defensa de la Llingua Asturiana anuncia qu’hasta’l prósimu 29 d’ochobre va poder visitase L’Amuesa d’Obres d’Arte pola Oficialidá, asitiada na Casa Cultura de Nava.

“Na Amuesa van poder atopase más de cinquenta obres, pintura y escultura, donaes por artistes asturianos pa sofitar les campañes del Conceyu Abiertu pola Oficialidá”, señala la Xunta. Amás, destaca qu’esta ocasión ye “inmeyorable, non solo pa invertir n’arte asturianu, sinon pa sofitar económicamente la defensa de los derechos llingüísticos”.

Sobre L’Amuesa, que ta espuesta hasta’l 29 d’ochobre na Casa Cultura de Nava de 9.30 a 20.30, el colectivu prollingua destaca que ta siendo un puntu d’alcuentru “pa la xente más representativa de la cultura y la política de Nava” y que dexa claro que “les agrupaciones de base de los partíos políticos mayoritarios n’Asturies nun comparten coles sos cúpules dirixentes el rechazu a la llingua asturiana y a la so oficialización”.