Inaugúrase en Quirós un nuevu Muséu Etnográficu
|
19 Ochobre, 2010 por E.P. / Redacción
- Inicie sesión o rexístrese pa espublizar comentarios
El Presidente asturianu, Vicente Álvarez Areces, inauguró esti martes el nuevu Muséu Etnográficu de Quirós, que se va convertir en "ún de los símbolos más importantes na recuperación de la cultura tradicional asturiana" según informó l'Executivu.
El proyectu supunxo una inversión de 4,2 millones d'euros y a l'abertura oficial d'esti equipamientu tamién asistieron l'alcalde de Quirós, Agustín Farpón; la conseyera de Cultura y Turismu, Mercedes Álvarez González; y el director xeneral de Turismu y Patrimoniu Cultural, José Luis Vega Álvarez.
L'oxetivu del muséu ye'l de tornar en "un parque museográficu vivu y abiertu al esterior", nel que se representen y muestren les costumes quirosanes. El complexu incorpora edificios tradicionales, que van asitiar el muséu etnográficu y de cultura popular, y l'edificiu d'Antiguos Altos Fornos, nel que se recrea un primitivu Altu Fornu.
El proyectu executóse gracies a un acuerdu ente l'Institutu pa la Reestructuración de la Minería del Carbón y Desarrollu Alternativu de les Comarques Mineres, el Gobiernu d'Asturies y el Conceyu de Quirós.
El complexu museográficu cumple delles funciones, como la de ser el centru de recepción del parque etnográficu y centru d'interpretación del propiu parque. Tamién va ser, según el Gobiernu asturianu, un aula didáctica sobre cultura tradicional, minera y paleo-industrial, y centru d'información turística y redistribución de visites, asitiáu nes proximidaes de Bárzana, la capital del conceyu.
Reflexu de la sociedá tradicional
Esti proyectu cultural, que ta directamente vinculáu a otru de los grandes curiosos de la zona, la Senda l'Osu, conxuga amás la cultura rural y industrial y intenta ser "un reflexu de la sociedá llocal del sieglu XIX", según la Conseyería.
El complexu dispón de distintos espacios vinculaos ente sí; un centru de recepción, que ye llugar más apropiáu pa interpretar tol conxuntu, valiéndose del mesmu pa la información turística; y un aula didáctica que muestra la cultura tradicional y el so nexu cola industrial.
Efrén d'Andrés
