Los sindicatos mayoritarios refuguen otra fuelga xeneral

El secretariu confederal de Comunicación de CC.OO., Fernando Lezcano, avanzó que los sindicatos estudien la convocatoria de nueves movilizaciones a mediaos d'avientu, anque "non en forma de fuelga xeneral".

Asina lo indicó en rueda prensa pa presentar l'informe que'l secretariu xeneral de CC.OO., Ignacio Fernández Toxo, treslladó güei pal so debate al Conseyu Confederal del sindicatu, y que sienta les bases de la estratexa sindical tres la fuelga del 29 de setiembre.
  
Pa los sindicatos, "el conflictu va permanecer abiertu hasta qu'haya un cambiu significativu" nes polítiques económiques del Gobiernu y, especialmente, na reforma llaboral. De la mesma, Lezcano calcó en que'l movimientu sindical n'España nun pue siguir la mesma estratexa de movilizaciones qu'en Francia, onde s'asoceden les fuelgues xenerales, "puesto que la coxuntura y la realidá" d'ambos países son distintes y "sería un fracasu".
  
"Lo que paez procedente agora ye espresar la tensión de les movilizaciones con otru tipu d'acción (distinta a la fuelga xeneral)", señaló, pa esplicar de siguío que, amás, lo contrario supondría "devaluar" el 29-S.
  
Sicasí, tamién indicó que la respuesta sindical siempre va ser proporcional a l'agresión a los derechos de los trabayadores y que, nesti sen, "naide ta en condiciones de negar que puea haber una nueva convocatoria de fuelga xeneral".
  
Iniciativa lexislativa popular
En paralelo a les movilizaciones, los sindicatos prevén presentar una iniciativa lexislativa popular pa intentar modificar principalmente los aspectos de la reforma llaboral rellacionaos cola contratación y el despidu.