La CSI va participar na manifestación contra los Premios Príncipe

La Corriente Sindical d’Izquierda vien de llamar a la participación na manifestación contra los Premios Príncipe que va celebrase n’Uviéu. “Nun tamos pa mantener a families reales”, argumenta’l sindicatu.

L’Ensame República Asturiana (ERA) convocó, como nos últimos años, una manifestación contra los Premios Príncipe. La protesta va arrancar el prósimu sábadu 23 d’ochobre, a les 13 hores, de la Estación del norte d’Uviéu.

El colectivu antimonárquicu critica que los Premios Príncipe tán creaos por “vieyos herederos del franquismu nun intentu intentu de llavase la cara y xustificar, y democratizar, una institución como la casa real que ye heredera del franquismu”.

Pal ERA estos premios, a la par que’l “títulu créau pola corona de Castiella pa intentar calmar les continues revueltes n'Asturies”, son una “humildación”. L’ensame refuga amás, ente otres coses, que los premios se presenten como populares “cuando la presencia a los mesmos ta suxeta a invitación”, y que la Fundación Príncipe “manexe un presupuestu de 20 millones d'euros y se-y dean terrenos publicos n'Avilés”.

El sindicatu asturianu CSI mostró l’apoyu a esta convocatoria. “Como bien diz l’ERA nun tamos pa mantener a families reales, porque tenemos derechu a decidir el nuesu futuru, porque los premios príncipe son la humildación d’un pueblu”, señalen.