Arias reflexa’l surdimientu del 1u Mayu na so última novela premiada

L'escritor Ismael Arias da un repasu pal público mozo en “Les puertes del paraísu”, premiu Maria Josefa Canellada, al movimientu obreru del sieglu XIX y el surdimientu del Primeru de Mayu como’l día de los trabayadores.

'Les puertes del paraísu', última novela d’Ismael Arias, ye la ganadora del premiu María Josefa Canellada, de Lliteratura Infantil y Xuvenil, que concede la Conceyalía de Cultura del Gobiernu asturianu. La obra presentóse la selmana pasada en Mieres.

Esta novela cuenta la historia d'un rapacín de Mieres de 13 años, que falsifica la edá pa poder embarcar rumbo a Chicago onde trabaya'l so tíu. Coincide ellí coles grandes güelgues del tiempu, el surdimientu de los movimientos obreros y los fechos de la plaza Haymarket.

El 1 de mayu de 1886, mientres una manifestación obrera que la policía taba reprimiendo, alguién llanzó una bomba contra los axentes. Condenóse a muerte a cinco trabayadores y a otros trés mandóselos a prisión. Estos fechos dieron pie a la celebración en tol mundu del primeru mayu, en memoria de los executaos y encarcelaos, a los que se denominó 'Mártires de Chicago'.

Temática didáctica
Arias escoyó'l tema pol "desconocimientu absolutu ente la xente mozo de lo que fue la llucha sindical a lo llargo de los últimos cien años". "Y, más que nada, viendo como, productu de la crisis na que llevamos instalaos un par d'años, lo que tanto tiempu tardó en consiguise va perdiéndose", añade, en declaraciones a Europa Press.
  
L'autor vien precisamente "d'una familia d'emigrantes orixinaria de Teberga”, y el so tataragüelu y el bisgüelu desplazáronse a Estaos Uníos, Cuba, México y Filipines. Sicasí, como lleva más de 40 años viviendo en Mieres, "la historia parte de Mieres y de les condiciones de trabayu alredor de la mina y la industria a finales del sieglu XIX".
     
La intención d'Arias yera "contar una hestoria d'aventures que trescurriera nun tiempu nel qu'ocurrieren enforma coses". Y, principalmente, "contar una historia na que los protagonistes teníen bien pocos años pero l'idealismu necesariu pa ser a cambiar el mundu, anque fuera a base de poner bombes, matar a empresarios y demás estrataxemes güei tan políticamente incorrectes". Recordó amás que ye una novela con poques páxines y fácil de lleer.