Acaba’l DOP ensin aprobar nenguna propuesta del Bloque por Asturies

El Debate d’Orientación Política acabó esti llunes na Xunta Xeneral. De les 67 propuestes presentaes en total, namás que s’aprobaron diez: nenguna del BA, cuatro del PSOE, una conxunta ente PSOE y IX, cuatro d’IX y una del PP.

De toles propuestes presentaes, los grupos parlamentarios nel Debate d’Orientación Política namás qu’aprobaron diez y sólo dos d’elles por unanimidá -una del PSOE y otra conxunta de PSOE y IX- rellacionaes col turismu cultural y el caltenimientu de les ayudes al carbón polo menos hasta'l 2022.

En materia d'infraestructures aprobóse pidir al Executivu que presente un calendariu y entaine les obres pendientes nes principales infraestructures asturianes -l'Autovía del Cantábricu, l'AVE y l'autovía Uviéu-La Espina--, encamentando al Gobiernu que siga desarrollando les infraestructures de saniamientu y depuración de les agües residuales nos asentamientos rurales, con cuenta d'algamar mayores cotes de calidá de vida y bienestar de los sos habitantes, favorecer el desarrollu y la diversificación de la economía rural, garantizando la so sostenibilidá al traviés del canon de saniamientu.

Tamién s'aprobaron les propuestes del PSOE nes que se pide encamentar al Gobiernu que, nel Presupuestu de 2011, se caltengan les cantides económiques necesaries pa caltener los aspectos esenciales del Aceba.
  
Recuperar nos presupuestos del 2011 les dotaciones necesaries pa la puesta en marcha de los programes de desarrollu alternativu de les comarques mineres; caltener el serviciu de los actuales trenes d'alta velocidá Alvia y pidir la implantación d'un Plan de recoyida selectiva de materia orgánico, fueron otres de los trés propuestes d'IX que salieron alantre.

PSOE refuga toles propuestes del BA
El diputáu del Grupu Mestu, Roberto Colunga, foi'l primeru en defender les 25 proposiciones presentaes pol so grupu, toes elles refugaes pol Parlamentu. Esplicó que parte de les mesmes correspuenden a proyectos de llei, como'l de Salú y Servicios Sanitarios, el de Protección Ambiental o'l proyectu de Llei d'Accesu a la Vivienda.
  
La llingua asturiana foi otra de les materies que protagonizaron les propuestes de resolución de Bloque por Asturies, asina como les infraestructures o la defensa del sector del carbón. Sicasí, el PSOE refugó les 25 propuestes presentaes por Roberto Colunga.

Izquierda Xunida-Los Verdes apoyaron cuatro de les resoluciones del BA, les referíes a la normalización del asturianu, "non porque lo pida'l Grupu Mistu sinón porque son coherentes col so ideariu", según argumentó la diputada d’IX-Verdes Diana Camafeita.

Una del PP
Pela so parte el PP namás llogró sacar alantre una de les 31 propuestes presentaes gracies al apoyu d'IX y del Bloque por Asturies. Trátase de la propuesta d'encamentar al Gobiernu del Estáu a siguir cola política de revalorización de les pensiones na midida na que se produzan subíes del IPC.