Anulada la resolución d'Educación qu'establecía un númberu mínimu d'alumnos pa estudiar asturianu

La Sala de lo Contencioso Alministrativu del Tribunal Superior de Xusticia d'Asturies, falló a favor de la demanda contra la resolución de la Conseyería d'Educación, pola que s'establecía un númberu mínimu d’alumnos pa cursar llingua asturiana.

El Tribunal estima'l recursu interpuestu por CC.OO y "declara nulu y sin efectos por ser contraria a Derechu, l'artículu 5.1 de la mesma, qu'establecía un númberu mínimu d'ocho alumnos pa formar un grupu na asignatura de Llingua Asturiana na Educación Secundaria".

Según informó CC.OO, trátase d'una "reclamación histórica" pa garantizar el derechu a cursar l'asignatura de forma voluntaria, sin depender del númberu d'alumnáu que lo solicite.

La Sala entiende que l'Alministración, al establecer un númberu mínimu pa formar un grupu, desvincúlase de la obligación que-y impón la Llei 1/1998 d'usu y promoción del bable-asturianu, de garantizar la so enseñanza en tolos niveles y graos, con independencia del númberu d'alumnos qu'opten.

La sentencia tamién dexa claro que, nesti casu, por doctrina del Tribunal Supremu, nun pue desoyese'l mandatu llegal del artículu 10.1 de la Llei 1/1998 con base a razones presupuestaries, dao que  l'Alministración debería motivala y xustificala

Primera demanda sobre l'asturianu estimada
CC.OO. aplaude esta sentencia y diz que ye "la primera" na que los tribunales estimen una demanda sobre la Llingua asturiana. "Poro, constitúise en tou un referente nel camín hacia la normalización llingüística y nel respetu a la nuesa cultura", manifestaron.

Asina, el sindicatu esixe cumplimientu "inmediatu" de la sentencia. "En toos aquellos institutos qu'haya alumnáu deriváu a otres materies por nun cumplir col requisitu del númberu mínimu d'alumnos, tien que garantizase la enseñanza del bable asturianu dientro del derechu fundamental de los padres a escoyer la so enseñanza, como componente del derechu fundamental a la educación, n'execución de sentencia", manifestaron.