Colunga: “Areces púnxose mui nerviosu y fizo de poli malu”

El llunes 18 va dar acabación el Debate d’Orientación Política na Xunta Xeneral. Nél, los grupos parlamentarios van presentar diferentes propuestes de resolución. El diputáu del BA fala a ASTURIES.COM de les 25 propuestes del so grupu.

El vienres 15 cadún de los grupos parlamentarios posicionóse sobre la xestión política del Presidente del Principáu, Vicente Álvarez Areces. El llunes 16 va ser el día de presentar y debatir les 66 propuestes de resolución que presenten ente tolos grupos parlamentarios.

“Son 25 les propuestes en total. Unes van na llínia d’infraestructures, otres sobre les lleis que nel so momentu firmáronse nos alcuerdos de gobiernu, otres de llingua asturiana, trabayu, mediuambiente y cuestión de salú”, declara Roberto Colunga a ASTURIES.COM sobre les propuestes que va presentar el llunes na Xunta Xeneral.

Temes como la xestión de residuos, la especialidá de Profesor de Llingua Asturiana, la estabilidá pa los trabayadores de la Rede de Normalización Llingüística, los presupuestos pa la TPA, Juliana y Naval Xixón o los fondos de reactivación pa les Comarques Mineres; son dalgunos de los asuntos presentes nes propuestes de resolución presentaes pol Bloque por Asturies.

“El problema que tien el nuesu grupu parllamentariu ye que nun tenemos a naide na mesa la cámara, entós nun sabemos si aceptarán les nueses propuestes o les dexaran pa prau”, diz Colunga sobre les espectatives pa llevar a debate les 25 propuestes. Sicasí, sorraya que nun ye vezu que refuguen propuestes y camienta que “aprobarán dalguna”.

En total presentáronse 66 propuestes. 5 el PSOE – una d’elles compartida con IX-, otres 5 propies Izquierda Xunida, 31 el PP y les 25 del Bloque por Asturies.

El “nerviosismu” d’Areces
“Areces púnxose mui nerviosu. Dende que toi nel Parlamentu nunca la vi de tal manera, pero creo que fuimos capaces a saca-y los colores” opina Colunga sobre la descalificación que’l pasáu vienres fizo Vicente Álvarez Areces tres la intervención del diputáu del BA.

Señaló amás que’l Presidente “como respuesta salió per peteneres, diciendo mentires y faciendo de poli malu p’asina poder sacar los presupuestos que se van aprobar dientro d’unos meses”. A la par, Colunga criticó qu’Areces lu calificara de “trésfuga” y recordó que’l cabezaleru del PSOE “marchó del PCE diciendo que nun diba abandonar el marxismu-leninismu y agora lo ves presidente d’un Principado sucursalista de Madrid y defendiendo les polítiques más neolliberales de la banca internacional”.