Marcos: Sigue siendo necesaria la esistencia de medios alternativos

Falu Marcos (Mieres, 1966) forma parte de Radio Kras dende 1986, un añu dempués de la so fundación. Anguaño ye responsable de Programación y Rellaciones esternes. Falamos con él nel 25 aniversariu d’esta radio llibre xixonesa.

 
25 años yá de Radio Kras nes ondes… ¿Podría facenos un balance xeneral?
Podríamos dicir que yá namás el fechu de caltener mientres 25 años un proyectu de comunicación alternativa ye positivu.
Amás, desendolcamos l'oxetivu principal de ser un mediu de comunicación onde tengan voz los movimientos sociales y les músiques alternatives y onde la ciudadanía pueda exercer el so derechu a la comunicación.

Na parte negativa podemos dicir que, dempués de 25 años, siguimos nuna situación de allegalidá colo que trai d'incertidume cara al futuru.

Sobre la allegalidá… la llei audiovisual camudó va poco ¿Cómo va afectar esta midida a les radios non comerciales?
La nueva Llei reconoz, por fin, la esistencia de les radios comunitaries pero dexa en manos de les Comunidaes Autónomes la repartida de llicencies ensin garantizar un porcentaxe del espaciu radioeléctricu pa los medios ensin ánimu d'arriquecimientu. Esperamos que n’Asturies, l'aplicación de la Llei dexe la continuidá de les radios llibres que lleven tantos años funcionando y nun suponga un pilancu.

Abonda xente pasó per esta radio nestos años ¿Podría falar un poquiñín de dalgunes de les persones que pasaron y programes que fueren especialmente recordaos nesti tiempu?
Estos díes calculábamos que más de 500 persones participaren faciendo un programa en Radio Kras, colo que resulta difícil contestar esta entruga.

Nel campu musical podemos mentar a xente como David Guardado y Tito Pintado, (Penélope Trip), Félix Domínguez y Jorge Muñoz (Doctor Explosión), Fran Gayo (Cambaral, Mus), Rafa Kas,… y programes como “El carro del camaleón” de Marka y Marta, “El rey lagarto” de Gonzalo, el jazz d’Horacio en “Merienda de Negros” (entá sigue activu), el reggae de Gabi en “La colina del profeta”.

Nel campu social y cultural pasaron por Kras: Boni Ortiz, investigador y críticu teatral, l'escritor y director de cine Ramón Lluis Bande, l'escritor Pablo Antón Marín Estrada, la xente de la Cordinadora Asturiana pola Insumisión col “Especial Insumisión”, persones  de grupos ecoloxistes, feministes, vecinales, sindicales, asociaciones culturales..

Y la llingua asturiana ¿Qué papel tuvo en too esti tiempu?
Na Carta fundacional de Radiu Kras yá recoyíemos ente los nuesos oxetivos la defensa de la llingua y la cultura asturiana y a lo llargo d'estos años hubo munchos programes n'asturianu nos que participaron los mentaos Ramón Lluis, Pablo Antón, Fran Gayo y otros como Nel Ricardo Álvarez Morán, Dani García de la Cuesta, Martín Fernández-Peña, Pelayo, Rubén Ardura, Silvia,… Títulos como “Al otru llau de la mar”, “Xentiquina”, “La Panoya”, “El Gueyu la Deva”, “Xixón Xabaz”, “La Romería de San Andrés”, “Tírate a les gochos” o “El Cocu -yos Castañes” formen parte de la hestoria de Radio Kras.

Anguaño nun hai nengún programa n'asturianu  asina qu'aprovechamos esta entrevista, pa convidar  a la xente que tenga interés en facelo a que se ponga en contactu con Radio Kras.

Yá en 1985 vos fundasteis baxo’l llema de que “Otra comunicación ye posible” ¿Cómo ve’l mundu de los medios de comunicación d’anguaño en rellación a fai 25 años?
Anque pasaron 25 años esiste bastante semeyanza. Coles nueves tecnoloxíes camudaron les formes pero non el fondu. Los medios de comunicación, polo xeneral, siguen la corriente del llamáu “pensamientu únicu” y siguen controlaos por grupos empresariales, polo que sigue siendo necesaria la esistencia de medios alternativos qu'ufierten una visión crítica de los acontecimientos.

Na so opinión ¿Qué pasó pa qu’agora tengamos unos medios de comunicación como los que tenemos?
Dende los poderes, tanto políticos como económicos, reforzaron la idea de que'l control de los medios de comunicación ye fundamental pa siguir calteniendo’l so poder. De lo que nun se fala nun esiste o una mentira cien vegaes contada acaba convirtiéndose en verdá, son dalgunes de les máximes que, sacante casos, remánense nos medios de comunicación convencionales. Los grupos empresariales tienen periódicos, revistes, radios, televisiones, páxines web dende onde amplifiquen la visión de la información que-yos interesa en cada momentu.

Sobre’l movimientu de radios llibres ¿Cómo se vivió’l surdimientu d’esta comunicación alternativa n’Asturies?
Paralelamente al surdimientu del movimientu de radios llibres, desenvolvíense otros movimientos sociales como l'ecoloxista, el feminista, el pacifista (tábemos en plena campaña anti-Otan). Tamién vivíamos en Xixón la durez de la reconversión industrial con movilizaciones casi constantes. La información que les radios llibres ufiertaben taba tan cercana a estos movimientos que yera la mesma xente de los colectivos quienes facíen los programes.

¿Recuerda más esperiencies de comunicación “llibre”? fanzines, etc. Anguaño yá nun hai casi movimientu nesi sen…
Mientres estos años hubo delles esperiencies que desapaecieron. Resulta complicáu caltener un mediu de comunicación alternativu yá que, de normal, faise col trabayu militante y voluntariu de les persones que formen parte d'él. La mayoría d'estos medios desendolcábense alredor de colectivos que al dir debilitándose o desapaeciendo provocaben el fin del mediu.

Sicasí, güei esisten n’Asturies medios escritos como Atlantica XXII o Diagonal Asturies, o medios dixitales como Glayíu o Asturbulla, qu'ufierten información alternativa a los   medios convencionales.

Y volviendo al tema de les radios llibres n’Asturies. Radio Kras en Xixón, Radio Sele y Radio Qk n’Uviéu ¿Esistieron más proyectos que yá desapaecieran?
En Xixón esistieron otros proyectos venceyaos a barrios como fueron Radio Oscura, Radio Babel, Radio Asgaya, Radio 12 o Radio Activa.
N’Asturies tamién sigue furrulando Radio Nava.

En toos estos años ¿Hebo dalgún tipu de coordinación ente les diferentes radios llibres asturianes? ¿Cree qu’habría posibilidá de crear una radio llibre qu’emita pa toa Asturies y con más posibilidaes d’alcance social de les qu’esisten anguaño?
La coordinación sigue siendo una asignatura pendiente nel movimientu de radios llibres n’Asturies. Antes del branu tuvimos un conceyu Radio QK, Radio Sele, Radio Nava y Radio Kras y tamos retomando la coordinación qu'esistió va años.

Técnicamente ye complicáu pero non imposible. Non se si una radio o otru mediu d'espresión, pero creo que sería necesariu un mediu onde tola xente que se mueve en Asturies alrodiu de la contrainformación pudiera participar, collaborar y construyir un mediu que fuera referencia pa toles persones que quieran acceder a la información dende una perspectiva crítica.

Lleven 25 años radiando con una visión crítica la realidá xixonesa y asturiana ¿Qué-y paez la evolución d’esta realidá?
En munchos aspectos la evolución foi negativa y sigue siendo necesaria la esistencia de medios alternativos qu'apurran una visión distinta del estáu de les coses.

Hailos que ven mui prieto’l futuru del periodismu ¿Usté qué opina? ¿Y el futuru de la comunicación alternativa?
El periodismu ta atáu de manes polos intereses económicos de los grupos empresariales y, mientres siga siendo asina, va ser difícil qu'haya cambios.
 
La comunicación alternativa, pesie a les dificultaes, creo que ta sabiendo aprovechar les nueves tecnoloxíes pa reforzase y ufiertar informaciones que va unos años resultaba casi imposible imaxinar.

¿Tendremos otros 25 años más de Radio Kras?
Mientres haiga persones con esmolecimientos sociales, culturales, políticos, musicales…que tengan interés en comunicar dende un mediu vivu como ye la radio, va siguir esistiendo Radio Kras.