González Riaño: “Ye illegal que Maxisteriu refugue la consideración de los estudios de Llingua Asturiana”

El profesor de Ciencies de la Educación y académicu Xosé Antón González Riaño señala que "ye inaudito que la Escuela de Maxisteriu refugue la consideración de los estudios de Llingua Asturiana como una "mención" nos planes d'estudiu de la titulación de maestru” y añade que “saben perfeutamente qu'eso ye illegal porque va a la escontra de la Llei d'Usu del Asturianu qu'afita la formación universitariu del profesoráu d'asturianu".

Nes declaraciones feches a Asturies.com conseña que “saben perfeutamente qu'eso ye illegal porque va a la escontra de la Llei d'Usu del Asturianu qu'afita la formación universitariu del profesoráu de Llingua Asturiana, saben amás qu'esta mención encaxa dafechu na orden ministerial de 27 d'avientu de 2007 que regula los oxetivos de formación del profesoráu y, en fin, saben qu'hai una demanda social d'estos estudios, por nun dicir que tán despreciando llexítimes aspiraciones profesionales de los futuros maestros”, y añadió que "yo, personalmente, camiento qu'estes amueses d'intolerancia son inalmisibles socialmente".

Pal profesor de Ciencies de la Educacion “si la decisión de la Escuela de Maxisteriu ye nun proponer tal "mención" que, nun escaezamos, nun obliga a naide, sinón que garantiza un drechu profesional al que quiera exercelu, la votación nun tendría valor nengún. Convién saber, entós, qu'habría que repetir la votación incluyendo la posibilidá de la "mención" de Llingua Asturiana. Dende llueu, ye obligación del Rectoráu facer posible esto non solo porque ye lo que s'axusta a la llegalidá, sinón porque'l tema forma parte del so programa eleutoral y tien que cumplilu porque pa eso salió escoyíu. El Principáu d'Asturies, en concreto la Conseyería d'Educación, tamién tien que tomar determín pa facer que se cumpla la llegalidá”.

González Riaño, que fixo estes declaraciones dende Bolivia quixo señalar finalmente que “agora mesmo toi en Bolivia, país que con menos de diez millones d'habitantes acaba d'aprobar una Constitución que reconoz el calter oficial de más de 30 llingües y minoríes llingüístiques... y que tien agora mesmo dafechu escolarizaes, con un sistema d'educación billingüe, al castellán, quechua, aymara y guaraní.... N'Asturies habría danos vergoña... y más que nun se dea una respuesta de les fuerces polítiques a tal desatín".