502 trabayadores muertos n'accidente llaboral nel Estáu

Un total de 502 trabayadores morrieron n'accidente llaboral nos ocho primeros meses del añu nel Estáu español. Sicasí, hai un descensu del 7’8% sobre l’añu pasáu, según los últimos datos del Ministeriu de Trabayu y Inmigración.

De xineru a agostu rexistráronse 424.015 accidentes llaborales con baxa, lo que supón un descensu del 5,8% respectu al númberu d'accidentes rexistráu n'igual periodu del añu pasáu (449.907 accidentes).
  
Del conxuntu d'accidentes, 375.185 accidentes produxéronse nel llugar de trabayu y 48.830 fueron siniestros "in itínere". Los primeros baxaron un 6,3% nos ocho primeros meses del añu, mientres que los segundos amenorgaron un 1,6%.
  
Los accidentes leves con baxa nel puestu de trabayu sumaron 371.577 hasta agostu, un 6,3% menos, y los graves algamaron los 3.228, un 5,3% menos que nel 2009. Nel casu de los accidentes "in itínere", rexistráronse 47.957 accidentes de carácter leve (-1,4%) y 751 de gravedá (-13%).

Servicios, el sector con más muertes
Por sectores, el de servicios concentró hasta agostu más d'un terciu de los accidentes mortales, con 181 finaos en xornada de trabayu. La construcción foi'l segundu sector con más siniestros mortales (103), y a ésti siguiéron-y la industria (63) y l'agricultura (33).
     
En cuanto al total d'accidentes con baxa, tamién el sector servicios rexistró'l mayor númberu, al axuntar 202.940 accidentes (-3,2%), siguíu de la industria, con 87.907 accidentes (-7,1%); la construcción, con 65.337 accidentes (-14,6%), y el sector agrariu, que rexistró 19.001 accidentes (-2,7%).
  
Al respecto de les enfermedaes profesionales, hasta agostu rexistráronse 11.702 casos, de los que 6.228 causaron baxa nel puestu de trabayu, cifra que representa un descensu del 5,7% al respecto d'igual periodu del añu anterior.